Almatyda 320 oryndy jańa balabaqsha ashyldy
ALMATY. Sáýirdiń 2-si. QazAqparat / Ádilet Musahaev / - Almaty qalasynyń Alataý aýdanynda jyl basynan beri ashylyp otyrǵan bul úshinshi balabaqsha. Bul jaıynda Almaty qalasynyń ákimi Ahmetjan Esimov jańa balabaqshanyń ashylý rásiminde atap ótti,
dep habarlaıdy QazAqparat.
Qala ákimi aýdan turǵyndaryn qýanyshty jaǵdaıymen quttyqtap, elimizde jyl saıyn bala sanynyń artyp kele jatqanyn jáne soǵan oraı balabaqshalar da salyna beretindigin jetkizdi.
«Qazir qalanyń damýyna kóp kóńil bólinip jatyr, sonyń bir dáleli búgingi 320 balaǵa arnalǵan jańa balabaqshanyń ashylýy. Munyń salyný jumysyna úkimet qarjysynan 650 mıllıon teńge jumsaldy. Bul aýdanda áli de osyndaı áleýmettik nysandar salyna beredi», deıdi A.Esimov.
Balabaqsha sońǵy úlgidegi jabdyqtarmen qamtylyp, barlyq talaptarǵa saı joǵary tehnologııamen salynǵan. Sondaı-aq onda sýdy jylytýda janarmaıdy únemdeý úshin arnaıy kún energııasyn paıdalanatyn batareıa qoıylǵan.
«Búgin aýdanymyzda keremet záýlim balabaqsha boı kóterip otyr. Bul, árıne, ata-analardyń kópten kútken armany edi. Osyndaı ıgi iske muryndyq bolǵan Elbasymyzǵa jáne osy istiń basy-qasynda júrgen el azamattaryna myń da bir alǵysymdy aıtqym keledi», deıdi aýdan turǵyny Rashıba Manapqyzy.
