Almatyda 32 mln teńgeni urlady dep ustalǵan zoobaq kassıri kinásin moıyndamady
ALMATY. QazAqparat - Almatyda 32 mln teńgeni jymqyrdy degen kúdikpen ustalǵan zoobaq esepshisiniń soty bastaldy, dep habarlaıdy QazAqparat tilshisi sot zalynan.
Aldyn ala tergeý jumystaryn qalalyq Memlekettik kirister departamenti júrgizgen bolatyn.
Іsti sýdıa Farrýh Omarov qarap jatyr.
Іs materıaldaryna sáıkes, Almaty zoobaǵynyń esepshisi bıletterdi satý barysynda kompıýterden 32 mln teńgeni joıyp jibergen.
«Nazarova Marına býhgalterlik esepti júrgizýge jaýapty tulǵa bola otyryp, býhgalterlik qujattarǵa qasaqana jalǵan aqparat engizgen. Osylaısha ol Almaty zoologııalyq parki MKK-ine zalal keltirip, QR QK 241-babynda kórsetilgen qylmys jasady. Sonymen qatar, óziniń qyzmettik laýazymyn óz múddesine paıdalanyp, ózine senip tapsyrylǵan múlikti urlady. Osylaısha oǵan QR QK 189-babynyń 4-bólimimen aıyp taǵylyp otyr», - dedi prokýror Erjan Quraqbaev.
Sot otyrysy barysynda Nazarovanyń áriptesteri, 2 kassırden jaýap alyndy.
Olardyń aıtýynsha, Marına Nazarova 1 kassada otyrǵan. Onyń mindeti - bılet satyp, esebin júrgizý bolǵan.
«Astynda 3 kassır otyratyn. 1-kassada satylǵan bılettiń esebin júrgizetin server ornatylǵan. Marına Nazarova sol servermen jumys jasaıtyn. Odan basqa serverdiń parolin zoobaq dırektory, bas býhgalter biletin. Keı kúnderi ol demalysqa ketkende basqa kassırler oryn aýystyratyn», - dedi kýáger Tájibaeva.
Ózine sóz berilgende Marına Nazarova kinásin moıyndamady.
Kelesi sot otyrysy 1 qarashaǵa belgilendi.
37 jastaǵy kúdikti Marına Nazarova 14 tamyzda ustalǵan bolatyn.
