Almatyda «316-shy atqyshtar dıvızııasy» derekti fılminiń kórsetilimi boldy
Onyń avtory - kınorejısser, stsenarıst, aqyn, aýdarmashy, Sh. Aımanov atyndaǵy «Qazaqfılm» kınostýdııasy AQ prezıdenti Baqyt Qaıyrbekov kórsetilim aldynda oqyrman qaýymǵa 28 panfılovashylar erliginiń mán-maǵynasy týraly áńgimelep berdi.
«28 panfılovshylardyń erligi bolmaǵan dep bósýshilerdiń sózderi jalǵan. Bul jerde másele shaıqastyń 1941 jyly 16 qarashada bolǵany-bolmaǵanynda nemese panfılovshylar sanynyń 28 nemese odan da kóp bolǵanynda emes. Shaıqas Dýbosekovo mańynda 16 qarashaǵa deıin de, 16 qarashadan keıin de bolǵan. Jaýyngerler kún saıyn erliktiń tamasha úlgilerin kórsetip, Otan úshin opat bolyp jatty. Ol jerde 28 ǵana emes, júzdegen jaýynger máńgi óshpes erlik kórsetti. Osy kúnderi 4-shi rota tolyǵymen qyryldy. Ol qaıta jasaqtaldy. Taǵy da qyryldy. Árıne, keıbir jerinde erlik áspettelip kórsetildi. Shyn mánisinde Dýbosekovo jol aıryǵyna jaýdyń 50 tankisi emes, 17 tankisi shabýyl jasady. Iá, Klochkov áıgili uran sózdi aıtqan joq. Biraq, ony hattarynan, ordenmen marapattalǵan kezde aıtqan sózderinen soǵan jaqyn sózderdi oqýǵa bolady. Biraq, budan jasalǵan erlikterdiń ulylyǵy, qudyrettiligi esh tómendemeıdi. Shyn máninde osy 28 panfılovshylardyń erligi soǵysta ǵalamat psıhologııalyq rol atqardy. Osy erliktiń arqasynda kóp adam eńsesin kóterdi. Bul erlik talaı adamdy erlik jasaýǵa ıtermeledi. Bul jerde men osy 28 panfılovshylar týraly alǵash ret gazetke aqparat bergen áskerı jýrnalıst Aleksandr Krıvıtsııdiń poetıkalyq erligin de aıryqsha baǵalar edim. Ol árıne shynaıy shyndyq turǵysynan alyp qaraǵanda keıbir derekterdi ásirelep kórsetti. Biraq, bul jalań emes, qasıetti shyndyq edi», - dedi B. Qaıyrbekov.
Aıta ketelik, fılm 2007 jyly jaryqqa shyqqan. Ony daıyndaýǵa 1,5 jyl ýaqyt ketken. Uzaqtyǵy - 52 mınýt. Fılm 2007 jyly Sevastopol qalasynda ótken «Birge jeńiske jettik» telekınofestıvalinde «Jaýyngerlik baýyrlastyq» atalymy boıynsha laýreat atanǵan.
Fılm kórsetilip bolǵannan keıin avtor kórermenderdiń birqatar suraqtaryna jaýap berdi.
