Almatyda 31 jyl burynǵy surapyl órtten qaza tapqandardy eske aldy
ALMATY. QazAqparat – Almatyda osydan 31 jyl buryn sońy jarylysqa ulasqan alapat órtti sóndirý kezinde qaza tapqan jandardy eske aldy, dep habarlaıdy QazAqparat tilshisi.
Bul qaıǵyly oqıǵa 1989 jyly 20 mamyrda bolǵan edi. Keshki 19:30 shamasynda gaz taratý stansalaryna 6 tsısterna propan gazyn jetkizý kezinde gaz tsısternalaryn tıegen quram teplovozben soqtyǵysqan. Qatty soqqy saldarynan órt shyqty.
19:36-da ortalyq órt sóndirý bazasyna bir áıel órt shyqqanyn habarlaǵan.
Birneshe mınýttan soń órttiń sońy jarylysqa ulasty. Qatty dúmpýden kelesi tsısterna aýdarylyp qalǵan. Ot jalyny birneshe metrge sanaýly sekýndtarda tarap ketti. Órtti sóndirýmen aınalysyp jatqan qyzmetkerler otty shardyń ortasynda qaldy. Іshki qyzmet kishi serjanty Ysqaqov E sol jerde mert boldy.
Órt sóndirý garnızonynyń komandıri Frıd Sháripov áriptesteri sııaqty aýyr kúıik shalsa da jedel járdem áketkenshe buıryq berip jatty.
Oqıǵa ornynan qutqarýshylar aýyr haldegi Ilshat Safarǵalıev, Quralhan Aqqulov, Mıhaıla Malıkov, Seıil Álimtaev, Vladımır Nıkýlenkony alyp shyqqan.
Órt sóndirýshilerdiń jankeshti aıqasynyń arqasynda basqa tsısternalar jarylmady. Túngi 22.20-da órt aýyzdyqtalyp, 01:45 mınýtta tolyǵymen sóndirildi.
Birneshe saǵatqa sozylǵan jan alysyp, jan berisken aıqasta adamdar jeńdi. Biraq, birneshe órt sóndirýshi qurban boldy.
Abdranov I.A., Qasymov R.A sol jerde kóz jumdy. Aýyr halde jatqan órt sóndirýshilerdiń ómirin arashalaý úshin respýblıkanyń, búkil odaqtyq kúıik ortalyǵynyń mamandary jumyldyryldy.
Qazaq KSR DSM janynda táýlik boıy arnaıy shtab jumys istedi.
Aýrýhanada Frıd Sharıpov, Ilshat Safarǵalıev, Quralhan Aqqulov, Mıhaıl Malıkov, Seıil Álimtaev, Vladımır Nıkýlenko qaıtys boldy.
KSRO Joǵarǵy keńesi prezıdıýmynyń jarlyǵymen Abdranov I.A., Aqqulov Q., Álimtaev S.K., Isqaqov E.K., Qasymov R.A., Nıkýlenko V.V., Malıkov M.I., Safarǵalıev I.F., Sharıpov F.A. Qyzyl juldyz ordenimen marapattaldy.
Órt sóndirýde erlik kórsetkeni úshin Almaty órt sóndirý basqarmasy men Іshki Іster basqarmasynyń 20 qyzmetkeri marapattaldy.
Búgin osy qaıǵyly oqıǵaǵa - 31 jyl. Almatyda órt sóndirýshiler eskertkishine gúl shoqtary qoıyldy. Epıdemıologııalyq ahýalǵa baılanysty eske alý rásimi bir ǵana órt sóndirý bóliminiń qatysýymen ótti.
