Almatyda 31 qazan kúni «Arsenal» jedel aldyn alý sharasy bastalady
ALMATY. 25 qazan. QazAqparat /Názıra Eleýhan/ - Almatyda qazan aıynyń 31 men karashanyń 2-si aralyǵynda qalamyzdaǵy qylmystyq ahýaldy turaqtandyrý, jarylǵysh zattar men atys qarýlarynyń taralýynyń jolyn kesý maqsatynda «Arsenal-2011» jedel aldyn alý is-sharasy ótedi.
«Bul shara bizge tirkelmegen zańsyz qarýlar men jarylǵysh zattardy anyqtap, olardy zań júzinde tárkileýge úlken múmkindik beredi. Shara kezinde izdeý jarııalanǵan barlyq qylmyskerlerdi izdestirýmen qatar, zańsyz aınalymdaǵy atys qarýlary men jarylǵysh zattar tárkilenip, zańdy túrde tirkelgen qarýlary bar tulǵalardy turǵylyqty meken-jaılary boıynsha tekserý jumystary júrgiziletin bolady»,-dedi Almaty qalasy ІІD Qoǵamdyq qaýipsizdik basqarmasynyń lıtsenzııalyq-ruqsatnama berý júıesiniń bastyǵy Erlan Meımanqulov.
Onyń aıtýynsha, mundaı shara qalamyzdaǵy qylmystyq ahýaldyń turaqtanýyna oń yqpal etpek.
«Bul shara barysynda qala polıtsııasynyń barlyq syrtqy qyzmetteri kúsheıtilgen jumys tártibine kóshiriledi. Atys qarýlary men jarylǵysh zattardy áshkereleý maqsatynda ýchaskelik ýákilder men jol saqshylary kúdik týdyrǵan barlyq azamattardy tekseretin bolady. Óıtkeni, búginde qalmyzda tirkelmegen tegis uńǵyly myltyqtar men travmatıkalyq qarýlar sany birshama ósti. Kóp jaǵdaıda mundaı qarý ıeleri qylmystyq jaýapkershilikten jaltaryp ketemiz degen nıetpen qarýlaryn tirkeýden ótkizbeıdi. Al kóp jaǵdaıda zańdy túrde tirkelgen qarý ıeleri jaı ǵana qarý saqtaýdyń qaýipsizdik sharalary men ony tasymaldaýdyń qaǵıdalaryn saqtamaıdy»,-dep atap ótti E.Meımanqulov.
