Almatyda 3000 oqýshy mamandyqtar marafonyna qatysyp jatyr
ALMATY. QazAqparat - Almatyda mektep bitirýge daıyndalyp júrgen oqýshylar arasynda mamandyqtar marafony jalǵasyp jatyr, dep habarlaıdy QazAqparat tilshisi.
4 kezeńnen turatyn ınnovatsııalyq jobany «EDTECH» halyqaralyq bilim berý qory men qala ákimdigi QR Prezıdenti Nursultan Nazarbaevtyń Joldaýynda kórsetilgen Jetinshi qadam - jastar arasyndaǵy jumyssyzdyqty tómendetý maqsatynda júzege asyryp otyr.
Aıta ketý kerek, pılottyq joba ázirge Almatynyń 3000 jýyq oqýshysyn qamtıdy.
Jasóspirimderdiń kásibı baǵdaryn aıqyndaý boıynsha marafonnyń 1-kezeńi byltyr qarashada bastalǵan bolatyn.
Eń aldymen joba aıasynda 300 jýyq psıholog kásiptik baǵdar berýdiń jańa túrleri men nátıje beretin tásilderin úırenip, oqý kýrsynan ótti.
Jeltoqsanda «Tsıfrly Qazaqstan» keshendi baǵdarlamasynyń sheńberinde 4500 astam 11 synyp oqýshysy onlaın túrde kásibı dıagnostıkadan ótip, ár oqýshynyń tulǵalyq ereksheligi, kásibı qyzyǵýshylyǵy, ıkemdiligi, qabileti anyqtaldy.
Búgin ınnovatsııalyq jobanyń úshinshi kezeńi Mamandyq tańdaýǵa aranlǵan ınnovatsııalyq forýmy esigin ashty.
Oǵan qala mektepteriniń oqýshylary, muǵalimderi, ata-analar JOO ókilderi qatysyp jatyr.
«Mamandyq tańdaýda Qazaqstan halqynyń mentalıteti de erekshe. Bizde kóp ata-analar oqýǵa túsiretin kezde «grant» bar oqý oryndaryn izdeıdi. Nátıjesinde balanyń arman-maqsaty oryndalmaıdy, qabileti ashylmaıdy. Adamnyń ózi jáne otbasy baqytty bolýy úshin durys mamandyq tańdaý óte mańyzdy. Eldiń myqtylyǵy sol eldiń azamattarynyń myqtylyǵyna baılanysty emes pe? Bizdiń maqsatymyz - olardyń myqty azamat bolýyna qolqanat bolý», - dedi «EDTECH» halyqaralyq bilim berý ortalyǵy basshysy Ǵanı Beısembaev.
Almaty qalasy ákiminiń keńesshisi Mamaı Ahetovtiń aıtýynsha, óz mamandyǵynyń sheberi bolý - zaman talabynan týyp otyrǵan qajettilik.
«Búgingi ýaqyt óte jyldam ótip jatyr. Burynǵydaı uzyn arqan, keń tusaý deıtin zaman joq. Kez kelgen ata-ana balasy mektep bitirer kezde balasynyń bolashaǵy qaı baǵytta bolatynyn bilgeni durys. Osydan 10-15 jyl buryn joq mamandyqtar paıda bolyp otyr. Kerisinshe keıbir mamandyqtar joǵalyp jatyr», - dedi Mamaı Ahetov.
«EDTECH» halyqaralyq bilim berý ortalyǵy osy maqsatta «Mamandyq tańdaý kilti» kitabyn jaryqqa shyǵardy.
Trenıng kitaby 9-11 synyp oqýshylaryna, mektep psıhologtary men synyp jetekshilerine, ata-analarǵa arnalǵan.
3000 jýyq tırajben shyqqan kitap qazir Almaty qalasynyń kitaphanalarynda tegin taratylyp jatyr.
