Almatyda 300 myń túp aǵash otyrǵyzylady
ALMATY. QazAqparat- Almatyda kúzde 300 myń túp aǵash otyrǵyzylady. Bul týraly tikeleı efır barysynda Baqytjan Saǵyntaev aıtty, dep habarlaıdy QazAqparat tilshisi.
Qala basshysynyń sózinshe, aǵashtar Naýryzbaı men Alataý aýdandaryndaǵy «Alǵabas», «Shuǵyla» jáne taǵy basqa turǵyn keshenderiniń aınalasyna otyrǵyzylady.
Sonymen qatar, magıstraldy kóshelerdiń - Rysqulov, Abaı, ál-Farabı dańǵyldarynyń, Tımırıazev kóshesiniń boıyna tal egiledi. Trotýarlardyń, bólý jolaqtarynyń boıyna. Aǵash joq jerlerge jáne magıstraldi kóshederdegi úńgileý jumystary aıaqtalǵan – Abaı dańǵyly, Alataý kóshesiniń boıyna egiledi.
«Úı janyndaǵy aýlalardy kógaldandyrý úshin turǵyndarmen dástúrli «Jasyl aýla» aktsııasy ótedi. Barlyǵy 300 myń aǵash otyrǵyzý josparlanyp otyr. Aıta keterligi, kóktemde 64,5 myń aǵash otyrǵyzyldy. Bıyl tamyr jaıýy tómen ári aýrýǵa beıim bolýyna baılanysty qala jóke aǵashy, sánaǵash, boz arshadan bas tartady. Jergilikti aǵashtarǵa basymdyq beriledi, onyń ishinde «Qazaqstan» teregi men qaraǵash bar»,- deıdi Baqytjan Saǵyntav.
Qalalyqtardyń suraqtaryna jaýap bere kele, ákim «Jasyl Almaty» aktsııasy aıasynda 5,5 myń qaraǵaı otyrǵyzylǵanyn aıtty.
«Tabıǵat» EYU qorynyń bastamashyl toby saıabaq aýmaǵyna 350 qaraǵaı men 500 alma aǵashyn otyrǵyzdy. Jasyl jelekti kútý úshin skvajına jasaldy,sýarý júıesi tartyldy. Aǵashtardyń 80%-y avtomatty júıeniń arqasynda sýǵarylady»,- deıdi ákim.
Qaraǵaı ormanǵa qarsy qaıyń toǵaıy otyrǵyzyldy, onda 2,5 myń aǵash bar. Arheologtarmen kelisim boıynsha Saq qorǵany aınalasyna 2 myńǵa jýyq aǵash otyrǵyzyldy. «Boraldaı» men «Zerdeli» shaǵynaýdandarynda jańa saıabaqtar salynyp jatyr.
