Almatyda 300-ge jýyq adam Nursultan shyńyn baǵyndyrdy
Qalanyń aqparattyq-sporttyq habynyń málimetine sáıkes, atalmysh shara Shymbulaq taý shańǵy kýrortynda 5 myń adamnyń basyn qosty. Onyń ishinde Eýropa men Azııa elderinen kelgen qonaqtar qatysty. 4 376 metrdi baǵyndyrýǵa tilek bildirýshiler arasynda kásipker sportshylar, balalar men eresekter te boldy.
Aıtýly dodaǵa 16 jastan joǵary barlyq qatysýshylar baqtaryn synady, al odan kishileri ata-analarymen birge qatysty. Aıta ketetin jaıt, qatysýshylar arasynda Qazaqstan qalalarymen qatar, TMD elderinen kelgender de boldy.
- Men alǵash ret shyńǵa shyqtym. Qazaqstanǵa issaparmen kelgenmin, áriptesterim osy sporttyq sharaǵa qatysýǵa keńes berdi. Maǵan barlyǵy unady. Taǵy birneshe kúnge qalý josparda bar, - dep bólisti Reseıden kelgen qonaq Sergeı Sadovskıı.
Sonymen qatar, óz áserlerimen elorda qalasynyń turǵyny Áıgerim Jumadilova da bólisti. Boıjetken Astanadan alpınıadaǵa qatysý úshin arnaıy kelgen. Atap ótsek, osy jyly aıtýly doda 22-shi márte ótti.
- Bul jarys týraly tátemnen estidim. Sóıtip, ǵalamtordan tolyq aqparatty taýyp, qashan, qaı ýaqytta ótetinin bildim. Astanadan baq synaýǵa keldim. Shyny kerek, tájirıbesiz, shyńǵa shyǵý ońaı emes. Biraq, men aýyr jeńil atletıkamen jáne bımen shuǵyldanamyn. Sondyqtan, jeńilirek boldy dep oılaımyn, - dep atap ótti Áıgerim.
Almaty qalasy ákimdiginiń qutqarý qyzmetiniń kómegimen Talǵar asýynda (3 200 m), al Almaty qalasy alpınızm federatsııasynyń qoldaýymen Nursultan shyńynda (4 376 m) buqaralyq Alpınıada qatysýshylaryn tirkeý ótti. Nátıjesinde, sońyna deıin 290 adam ǵana jete aldy. Olardyń ishinde marafon jáne skaırannıng sheberleri Alpınıada júldegerleri atandy. Erler arasynda 1 saǵat 55 mınýtta birinshi bolyp Malık Abdý-Aset kelse, al áıelder arasynda Aıjan Jombatyr shyńdy 2 saǵat 27 mınýtta baǵyndyrdy.
Márede qatysýshylar men Shymbulaq qonaqtaryn «Pandora» bı toby sergitti, al «Galantýs» toby ásem áýen syılady. Kishkentaı búldirshinderdiń kóńilin sahnada anımatorlar men Pavel Medved dıdjeıi ýóńil aýlady.
Aıta ketsek, Alpınıadanyń basty maqsaty salaýatty ómir saltyn nasıhattaý. Jyl saıyn shildeniń basynda dástúrli Alpınıada ótedi, onda adamdar teńiz deńgeıinen 4 376 metr bıik Nursultan shyńyna shyǵady. Bul eń bıik, ári keremet shyńdardyń biri.
