Almatyda 300-den astam prokýratýra qyzmetkerleri kezekten tys attestattaýdan ótedi
ALMATY. 28 sáýir. QazAqparat - Almaty qalasy prokýratýrasynyń www.almaty.prokuror.kz saıtynda qyzmetkerlerdi kezekten tys attestattaýdan ótkizýdiń ashyqtyǵyn qamtamasyz etý úshin arnaıy aıdar ashyldy.
Bul týraly prokýrordyń BAQ jónindegi aǵa kómekshisi Gúlnar Baısalamova búgin arnaıy ótkizilgen baspasóz brıfınginde málim etti.
«Kezekten tys attestattaýdan Almaty qalasynda 300-den astam prokýratýra qyzmetkerleri ótedi. Qazirgi kezde prokýratýra saıtynda «Almaty qalasy prokýratýra organdarynyń qyzmetkerlerin kezekten tys attestattaý» dep atalatyn arnaıy aıdar ashyldy. Onda attestattaý tártibiniń buzylýy faktileri men prokýratýra organdarynyń attestattaýǵa jatpaıtyn laýazymdy tulǵalarynyń sybaılas jemqorlyq pen basqa da quqyq buzýshylyqtar jasaýy, qyzmettik ádep normalaryn saqtamaýy týraly QR Bas Prokýroryna tikeleı ótinish berýge bolady», - deıdi G.Baısalamova. Onyń aıtýynsha, túsken málimetter jáne oǵan kirgen adamdarǵa qatysty aqparattar qupııa bolyp tabylady. Arnaıy elektrondy meken-jaıǵa túsken ótinishter prokýratýra saıtynda kórsetilmeıdi. Jeke jáne zańdy tulǵalardan túsetin málimetter prokýratýra organdarynyń tek quzyrly qyzmetkerlerine ǵana qoljetimdi bolady. Qajet bolǵan jaǵdaıda qyzmettik tekserý júrgizilip, ótinishterdi qaraýdyń nátıjesi kezekten tys attestattaý kezinde komıssııalarmen eskeriledi. Búgingi tańda quramyna BAQ pen qoǵamdyq jáne ardagerler uıymdarynyń ókilderi kiretin qalalyq prokýratýra boıynsha attestatsııalyq komıssııa quryldy.
