Almatyda 300-den astam adamdy kene shaqqan
Bul týraly qalalyq qoǵamdyq densaýlyqty saqtaý departamentiniń bólim basshysy Ánel Musaeva aıtty. Onyń sózinshe, Almatyda naýryzdan bastap kene shaqqan 314 adam aýrýhanaǵa júgingen. Onyń 158-i - 14 jasqa deıingi balalar.
«Naýqastardyń barlyǵy kenege qarsy ımmýnoglobýlın aldy. Sáýirde shetelden kelgen bir adamnyń kene entsefalıtin juqtyryp kelgeni anyqtaldy. Shymkenttik áıeldi Úndistanda kene shaqqan. Medıtsınalyq kómek almaǵan. Qazir áıel Almatydaǵy aýrýhanada emdelip jatyr», - dedi departamenttiń bólim basshysy Ánel Musaeva.
Departament ókilderiniń aıtýynsha, kene entsefalıtiniń adyn alý maqsatynda ári kenelerdiń sanyn azaıtý úshin qalada eki márte zararsyzdandyrý júrgiziledi.
«Bıyl 1 sáýirden bastap 2354,17 ga aýmaqta kenege qarsy zararsyzdandyrý jumystarynyń birinshi kezeńi júrgizildi. 8 ormandy saıabaq, 121 qala parki óńdeledi. Birinshi kezeńde 1295,26 ga aýmaq óńdeldi», - dedi Ánel Musaeva.
Tabıǵatta keneler naýryzdan qazanǵa deıin belsendi túrde kóbeıedi. Olarǵa +18-20 gradýs temperatýra men 80 paıyz ylǵal yńǵaıly. Mamandar osy ýaqyt aralyǵynda tabıǵat aıasyna shyǵatyn adamdar men týrısterge birneshe qaýipsizdik sharalaryn saqtaýdy eskertedi. Tabıǵat aıasynda birqalypty kıim kıip, kıimniń balaǵyn etiktiń ishine salyp júrý kerek. Kıimniń jeńderi bilekti qysyp turýy tıis. Al basqa oramal taǵyp júrgen jón. Shópke otyrýǵa, jatýǵa bolmaıdy.
Kene shaqqan jaǵdaıda 3 táýlik ishinde dárigerlerge qaralý qajet.