Almatyda 30-jyldardaǵy qazaq kóshi týraly konferentsııa ótedi
QR Bilim jáne ǵylym mınıstrligi Ǵylym komıtetiniń Sh.Ýálıhanov atyndaǵy Tarıh jáne etnologııa ınstıtýty jáne «Er Jánibek» halyqaralyq qoǵamdyq qorynyń uıymdastyrýymen ótetin konferentsııada «El bastaǵan Elishan» kitabynyń tusaýy kesilimek. Іs-shara sońynda batyr rýhyna Quran baǵyshtalyp, as beriledi.
Elishan Álipuly (1908-1943) - qazaq halqynyń basyna túsken 1930-1940 jyldardaǵy qandy kezeńniń qurbany. El-jurtyn zulymdyqtan qutqarý jolynda jan aıamaı arpalysqan kúresker tulǵa. Gımalaıdy tuǵysh ret asyp ótken qazaq kóshiniń basshysy.
Elim, jerim dep kúresken er Elishan Álipulynyń esimi ult tarıhynda erekshe orynǵa ıe. Onyń aty ádebıetterden, tarıhı kitaptardan oryn aldy. Elishan ómiri týraly jazylǵan Jádı Shákenulynyń «Qaraly kósh» romany Qazaqstanda úsh ret basylyp, túrik tiline aýdarylǵan. Túrkııada da jaryq kórdi. Kitap Túrkııa prezıdenti Rejep Taıyp Erdoǵannyń qolyna tıip, eldegi memlekettik kitaphanalar tórinen oryn aldy. Aıta keteıik, bıylǵy shilde aıynda Túrik eliniń Ystanbul qalasynda batyrdyń 110 jyldyq is-sharasy asa joǵary deńgeıde atalyp ótti.
«Azattyq ańsaǵan qazaq kóshi jáne el bastaǵan Elishan» taqyrybyndaǵy konferentsııa Elishan Əlipulynyń jaýǵa tize búkpeıtin qaısarlyǵy, erjúrektigi men túrki uldaryna tən ór rýhynyń urpaqqa berer sabaǵy, batyrdyń ómir joly men erlik izderine arnalady. Jıyn negizinen ult qaharmany jaıynda jazylǵan ádebıetter men ǵylymı zertteýler haqyndaǵy baıandamalardy qamtıdy. Sondaı-aq azattyq, erkindik ańsaǵan kóshtiń muraty - bizdiń búgingi táýelsizdigimiz ekenin, Otannyń qymbat qundylyǵy ekenin, ony məńgi qorǵap ótýdiń qajettigin urpaq sanasyna sińirýdi maqsat etedi»,- deıdi jazýshy J.Shákenuly.
Jıynǵa memleket jáne qoǵam qaıratkerleri, ataqty ǵalymdar, jazýshylar, zııaly qaýym ókilderi, Túrkııa, Germanııa, Shvetsııa jáne Mońǵolııadan keletin qonaqtar men Elishan batyrdyń urpaqtary qatysady dep kútilýde.
Shara «Ǵylym Ordasy» respýblıkalyq memlekettik kásipornynyń ǵımaratynda ótedi. Bastalýy - saǵat 10.00-de.
