Almatyda 30 mln teńge aıyppul tólemegen júrgizýshi ustaldy
ALMATY. QazAqparat - Almatyda arnaıy profılaktıkalyq shara barysynda Alataý aýdanynda 30 mln aıyppuly tólenbegen júrgizýshi ustaldy, dep habarlaıdy QazAqparat tilshisi.
Qalalyq ІІD baspasóz qyzmetiniń habarlaýynsha, Alataý aýdanynda «Boryshker» profılaktıkalyq sharasy barysynda aıyppuldy tólemeı kele jatqan azamattar ustaldy.
Atalǵan aýdanda 3 kún qatarynan "KRIS-P" mobıldi kesheni qoıyldy.
Bul apparat boryshker júrgizýshilerdi avtomaty túrde anyqtaýǵa arnalǵan.
Osy ýaqyt aralyǵynda boryshkerlerden 7 mln teńge óndirilgen.
«Inspektorlar 3 kún ishinde 7 mln teńge óndirdi. 100 kólik aıyp turaǵyna qoıyldy. Atap aıtqanda, bir basynda 30 mln teńge tólenbegen ákimshilik aıyppuly bar júrgizýshi ustaldy. Onyń kóligi de aıyp turaǵyna qoıyldy», - dedi Alataý aýdandyq ІІB ákimshilik polıtsııasy bólim basshysy Baýken Baıymbetov.
Onyń aıtýynsha, qazir júrgizýshilerge aıyppuldy smartfon arqyly tóleýge múmkindik týyp otyr.
«Bul degenińiz boryshker adam qaryzyn sol jerde-aq óteı alady degen sóz. Osy ýaqytta birneshe júrgizýshi osy ınnovatsııalyq tásildi paıdalandy»,- dedi ol.
