Almatyda 30 adam ata-ana quqyǵynan aıyryldy - ІІD
ALMATY. QazAqparat - Almatyda jyl basynan beri 30 adam ata-ana quqyǵynan aıyrylyp, 117-si ákimshilik jazaǵa tartyldy. Bul týraly Almaty qalasy ishki ister departamentiniń resmı ókili Saltanat Ázirbek aıtty, dep habarlaıdy QazAqparat tilshisi.
Búgin Almatydaǵy Dostyq úıinde «Jarasym» respýblıkalyq jastar birlestiginiń uıymdastyrýymen ótken «Jastar qaýipsiz qala úshin» dóńgelek ústel jıynynda basty baıandama jasaǵan Almaty qalasy ishki ister departamentiniń resmı ókili Saltanat Ázirbek jastar qylmysyna qatysty birqatar ózekti máseleni kóterdi.
«Megapolıste qaýipsizdik sharalary qashanda mańyzdy. Búgingi tańda qalada 6000 myńnan astam polıtsııa qyzmetkeri jumys isteıdi. Sonyń ishinde, jastar men jasóspirimdermen jumys isteıtin ıÝvenaldy polıtsııa bólimi bar. Almatyda jasóspirimder qylmysy bar ekeni jasyryn emes. Alaıda, onyń jyldan jylǵa azaıyp kele jatqanyn aıtý kerek. Mysaly, 2017 jyldyń 10 aıynda jasóspirimder arasyndaǵy qylmystyń eki ese azaıǵany baıqaldy. Qylmysty negizinen ózge óńirlerden jáne Almaty oblsynynan keletin jastar jasaıdy», - dedi Saltanat Ázirbek.
Resmı ókil qoǵamdaǵy belsendi jastardyń azamattyq pozıtsııalary ózge jastarǵa úlgi ekenin alaıda, keıbir kezde ata-analardyń tárbıe máselesinde salǵyrttyq tanytatyny alańdatatynyn jetkizdi.
«Biz azamatyq qoǵamdaǵy jastardy kórgende qýanamyz. Qoǵam qaýipsizdigine at salysyp júrgen jas almatylyqtardyń eńbegin de atap ótý kerek. Bala otbasynda qalyptasatyny belgili. Keıbir aldyńǵy býyn ókilderiniń osy uǵymdy eske almaıtyny ókinishti. Otbasynda baǵýsyz ósken balanyń bolashaǵy bulyńǵyr. Jastardyń qylmysqa áýes bolýy negizinen otbasynda durys tárbıe berilmegennen bolady. Jyl basynan 117 ata-ana balasyn qadaǵalamany úshin ákimshilik jaýapkershilikke tartyldy. Naqtyraq aıtqanda, olardyń balalary túnde kóshede júrip, ishimdik ishken. 30 ata-ana ata-ana quqyǵynan aıyryldy. Sondyqtan, qalanyń belsendi jastary qashanda úlgi», - deıdi Saltanat Ázirbek.
Aıta keteıik, búgin Almatyda Qazaqstan halqy Assmableıasy janyndaǵy «Jarasym» RJB «Birligi myqty jastar - bolashaqqa jol bastar» aktsııasyn ótkizgenin habarlaǵan bolatynbyz .
