Almatyda 3 jylda densaýlyq saqtaý júıesiniń ınfraqurylymy jańarady - Dosaev
Emdeý mekemesinde halyqqa neırohırýrgııa, neıroreabılıtatsııa, ýrologııa jáne taǵy basqa qyzmet túrleri qoljetimdi, sondaı-aq ortalyq bosandyrý, pedıatrııa, hırýrgııa, mammologııa baǵyttary boıynsha aqyly qyzmet kórsetedi.
Klınıkada 200-den joǵary bilikti maman jumys isteıdi, mekeme zamanaýı jabdyqtarmen, atap aıtqanda MRT, kompıýterlik tomografııa, sáýlelik dıagnostıka jáne taǵy basqa kabınettermen jabdyqtalǵan.
Erbolat Dosaev perzenthana kirip, bosanatyn áıelderdi quttyqtady. Ortalyq ashylǵan sátten bastap (2008 j.) onyń qabyrǵasynda 7,5 myńǵa jýyq bala dúnıege keldi, 2022 jyldyń basynan bastap 170 náreste ómirge keldi.
Ujymmen kezdesý barysynda Erbolat Dosaev medıtsınalyq ortalyq qyzmetteriniń joǵary sapasyn jáne densaýlyq saqtaý salasyna jeke ınvestıtsııalaýdyń mańyzdylyǵyn atap ótti.
«Aldaǵy 3 jylda qalamyzdyń densaýlyq saqtaý júıesiniń ınfraqurylymyn jańǵyrtý – meniń jumysymdaǵy basymdyqtardyń biri. Ókinishke oraı, sońǵy jyldary bizde barlyq zamanaýı standarttarǵa sáıkes keletin birde-bir jańa kópbeıindi aýrýhana paıda bolǵan joq. Biz jaǵdaıdy ózgerte alamyz dep oılaımyn, biraq bul úshin ýaqyt qajet. Aldaǵy úsh jylda júıeli jumys júrgizý qajet», – dedi qala basshysy.
Qazirgi ýaqytta «Kerýen-Medicus» medıtsınalyq ortalyǵynda anaǵurlym talap etiletin baǵyttardyń biri retinde bosandyrý qyzmetterin damytý jáne keńeıtý úshin jańa korpýstyń qurylysy júrgizilýde.
40 tósektik perzenthana qurylysy hırýrgııa, neırohırýrgııa, ortopedııa, travmatologııa jáne balalar hırýrgııasy sııaqty baǵyttar boıynsha klınıkany keńeıtýge múmkindik beredi.
Jańa korpýstyń qurylysy aıaqtalǵannan keıin qosymsha 150 jumys orny ashylady. Nysandy 2023 jyldyń naýryz aıynda paıdalanýǵa berý josparlanǵan.
