Almatyda 3 myńnan astam adamdy kene shaqty
ALMATY. QazAqparat – Almatyda kene entsefalıti jáne Laım aýrýymen syrqattanǵandar sany artty. Bul týraly Densaýlyq saqtaý mınıstrliginiń Sanıtarııalyq-epıdemıologııalyq baqylaý komıtetinen málim etti, dep habarlaıdy QazAqparat tilshisi.
«Epıdemııalyq maýsymnyń basynan bastap, 13 qazanǵa deıin Almatynyń medıtsınalyq uıymdaryna kene shaqqan 3068 adam júgindi. Onyń ishinde balalar sany - 1513. 2021 jyldyń sáıkes kezeńimen salystyrǵanda turǵyndardyń kene shaǵýy 23,5% - ǵa artqan (2021 jyly - 2344 jaǵdaı/ balalar sany-1260). Keneniń shaǵýynan zardap shekken 3066 adamǵa seroprofılaktıka júrgizildi (99,9%)»,- delinedi vedomstvo habarlamasynda.
Bıylǵy jyldyń 9 aıynda 100 myń turǵynǵa shaqqandaǵy 0,33 kórsetkishpen kene entsefalıtiniń zerthanalyq rastalǵan 7 jaǵdaıy tirkeldi. 2021 jyldyń sáıkes kezeńinde kene entsefalıti tirkelgen joq. Sondaı-aq, myń turǵynǵa shaqqanda 0,42 aýrýshańdyq kórsetkishimen Laım aýrýynyń (kene borrelıozynyń) 9 jaǵdaıy tirkeldi. Bul kórsetkish 2021 jyldyń sáıkes kezeńimen salystyrǵanda 2,8 ese joǵary (3 jaǵdaı, kórsetkish-0,15) boldy.
«Kene entsefalıti jáne Laım aýrýymen (kene borrelıozymen) aýyrǵandar medıtsınalyq kómek alý úshin travmatologııalyq pýnktterge ýaqtyly júginbegen, tıisinshe kenege qarsy ımmýnoglobýlın almaǵan, sondaı-aq, profılaktıkalyq maqsatta buryn kene entsefalıtine qarsy ekpe almaǵan. Dıagnoz qoıylǵan soń barlyq naýqastar qaladaǵy statsıonarlarda em aldy, nátıjesinde saýyǵyp ketti»,- dep habarlady vedomstvoda.
Qala aýmaǵynda kene arqyly tasymaldanatyn aýrýlardyń spetsıfıkalyq emes profılaktıkasy maqsatynda (2424,54 ga alańda) akarıtsıdtik óńdeý júrgizildi. Saıabaq jáne ormandy aımaqtar, adamdardyń demalatyn, jappaı jınalatyn oryndary óńdeldi.
Almaty qalasynyń sanıtarııalyq-epıdemıologııalyq baqylaý departamenti kene entsefalıtiniń aldyn alýdyń negizgi sharasy vaktsınalaný ekenin eske saldy.
Vaktsınalaný kýrsy 1-7 aı aralyǵynda eki ekpe alýdan turady. Kene entsefalıtine qarsy ekpeni jyl boıy alýǵa da bolady, degenmen, ekinshi ekpeden keıingi kelesi ekpeni 2 apta ótken soń alǵan durys. Eń qolaıly kezeń - birinshi jáne ekinshi vaktsınalaný arasyndaǵy ınterval, ıaǵnı, 5-7 aı (birinshisi kúzde, ekinshisi kóktemde) bolyp tabylady. Vaktsınalanýdy kúzde bastaý kerek, sebebi, epıdemııalyq maýsymnyń basynda adam aǵzasy ımmýndyq qorǵanysty damytady jáne qaýipti ınfektsııaǵa qarsy tura alady.
Turaqty ımmýnıtet úshin bir jyldan soń úshinshi ekpeni alý kerek. Keıin ımmýnıtetti saqtaý úshin úsh jyl saıyn revaktsınatsııalaý júrgizý qajet. Qalada egýdi turǵylyqty jeri boıynsha (nemese tirkelgen jeri boıynsha) aýmaqtyq emhanalarda dárigerdiń keńesinen keıin tegin alýǵa bolady.
«Vaktsına alǵan adamdar aýyrǵan jaǵdaıda olarda aýrý jeńil túrde ótedi jáne saldary az bolady. Ýaqtyly vaktsınalaný sizdi jáne jaqyndaryńyzdy kene entsefalıti aýrýynan qorǵaıdy»,- delingen komıtet habarlamasynda.
