Almatyda 3 myńnan asa kitap tegin taratyldy
ALMATY. QazAqparat- Almatyda ótken festıval sheńberinde túrli janrdaǵy 3 myńnan asa kitap tegin taratyldy, dep habarlaıdy QazAqparat tilshisi.
Festıvaldiń bas úılestirýshisi Maıra Áljanovanyń aıtýynsha, bıyl balalar jyly bolǵandyqtan, Kitap Fest festıvalinde balalar men jasóspirimder ádebıetine, jazýshylaryna kóbirek kóńil bólindi. Bul – bıylǵy is-sharanyń ereksheligi jármeńkede oqyrmannyń kitaptardy ózara almasýyna, jeńildikpen satyp alýyna nemese tegin alýyna múmkindik týdy.
«10 saǵatqa sozylǵan Kitap Fest festıvaliniń mádenı baǵdarlamasynda - festıval qonaqtary ákelingen kitaptarmen ózara almasýǵa, unaǵan kitaptardy jeńildikpen satyp alýǵa nemese olardy tolyǵymen tegin alýǵa múmkindik aldy. Bıylǵy kitap festıvalinde ár túrli janrdaǵy 3000-nan asa kitap tegin taratyldy» - dedi Kitap FEST kitap festıvaliniń bas úılestirýshisi Maıra Áljanova. Aıtýynsha, 8 jyl ishinde Kitap Fest Almatynyń kitap súıer qaýymy úshin ǵana emes, barlyq qazaqstandyqtar úshin súıikti alańǵa aınaldy. «2019 jyly biz festıvaldi elorda da ótkizdik jáne jyl saıyn múmkindikter shekarasyn keńeıtip, úzdiksiz damýǵa umtylamyz. Jaqyn arada kitap festıvalin elimizdiń basqa qalalary men óńirlerinde de ótkizýdi josparlap otyrmyz, óıtkeni oǵan úlken qyzyǵýshylyq pen suranys bar», - dedi ol.
Belgili qazaqstandyq jazýshy «18:47» kitabynyń avtory, «Altyn tobylǵy» baıqaýynyń jeńimpazy Doshan Jylqybaı jylsaıyn atalmysh kitap festıvali shyǵarmashylyq kezdesýler úshin bedeldi jáne qýatty alańǵa aınalǵanyn atap ótti. «Bundaı sharalardyń uıymdastyrylyp turǵany óte jaqsy. Ádette, jazýshylar óz aýdıtorııasymen tek kitaphanalarda nemese basqa da kishigirim jıyndarda kezdesip jatady. Al osyndaı kitap festıvalinde kez-kelgen kitapqa qyzyǵatyn adam óz súıikti jazýshylarymen tikeleı júzdesip, pikir almasyp kitabyn alýǵa múmkindigi bar. Sondyqtan mundaı sharalar avtorlardyń aýdıtorııasyn keńeıtedi dep oılaımyn»- dedi jazýshy.
Festıvalde «Mama, qazaqsha sóıleshi» orys-qazaq sózdiginiń jáne qazaq tilindegi balalardy damytý kitaptarynyń avtory Ásel Sapaqova balanyń jeke basynyń damýyndaǵy ádebıettiń róli týraly aıtyp berdi. « Bıyl festıvalde halyq sany kóp boldy, bizdiń maqsatty aýdıtorııamyzdyń kóp bóligi keldi desek te bolady. Barlyq kitaptar derlik satyldy. Osyndaı sharalardyń órkendeýin jáne kitapsúıer qaýymnyń qatary arta bersin dep tileımin»,- dedi Ásel Sapaqova.
Sondaı-aq festıvalde alǵash ret «Aýylǵa kitap» aktsııasy ótti, nátıjesinde 600-ge tarta kitap jınaldy. Aldaǵy ýaqytta olar Qazaqstannyń aýyldyq kitaphanalaryna tapsyrylady.
