Almatyda 3-qabattan qulaǵan balanyń basyna plastıkalyq ota jasalady
ALMATY. QazAqparat - «Mart» saýda oıyn-saýyq ortalyǵynyń 3-shi qabatynan qulaǵan 2 jasar balany búgin úıine qaıtaryp jatqan Almaty dárigerleri áli de 4-5 aılyq emdeý jospary bar ekenin aıtty, dep habarlaıdy QazAqparat tilshisi.
Balalarǵa jedel medıtsınalyq kómek kórsetý ortalyǵy bas dárigeriniń orynbasary Dinmuhammed Rýzýddınov balanyń jaǵdaıy qanaǵattanarlyq ekenin aıtty.
«Jarty jyl balanyń jaǵdaıyn baqylaımyz, jaqsy bolsa basyna plastıkalyq ota jasaımyz. Basyna qan quıylǵandyqtan birinshi otany basyna jasadyq. Bas súıeginiń detaldary saqtalyp tur. Jaǵdaıy jaqsy bolǵannan keıin ekinshi ota jasaımyz. Eske sala keteıik, bizge óte aýyr jaǵdaıda tústi. Qazirgi kezde jaǵdaıy qanaǵattarlyq. Buǵan deıin aıtqanymyzdaı, oǵan eki ota jasaldy. Birinshi, bas súıegin, ekinshi, ortańǵy jiligine jasadyq. Qazir gıpspen úıine qaıtarylady. Sosyn, aıaǵyndaǵy gıpsin sheshemiz», - dedi D.Rýzýddınov.
Eske sala keteıik, 20 qazan kúni Almaty dárigerleri 2 jasar Nurǵısanyń ortańǵy jiligine ota jasaǵan. Oǵan deıin, 12 qazan kúni aýrýhanaǵa alǵash jetkizilgende birinshi ota basyna jasalǵan bolatyn.
Aıta keteıik, 12 qazan kúni 2 jasar bala «Mart» oıyn-saýyq saýda ortalyǵynyń 3-qabatynan qulap ketken bolatyn. Dárigerler balaǵa ashyq bassúıek jaraqaty, ortańǵy jilik synyǵy, keýde, ish perdesiniń soǵylýy sekildi dıagnoz qoıdy. Oqıǵa Túriksib aýdandyq ІІB-de qaıǵyly jaǵdaı retinde tirkeýge alynǵan.
