Almatyda 3 avtokólik pen avtobýs soqtyǵysty
ALMATY. QazAqparat - Almatyda 3 avtokólik pen jolaýshylar avtobýsy soqtyǵysyp, saldarynan bir adam jaraqattandy, dep habarlaıdy QazAqparat tilshisi.
Jol-kólik oqıǵasy ál-Farabı dańǵylynyń boıynda, Gagarın jáne Jarokov kósheleri aralyǵynda oryn alǵan. Kýágerlerdiń aıtýynsha, rýlge ıe bola almaǵan «Mersedes» markaly kóliktiń júrgizýshisi sur tústi «Hıýndaı Aktsent» avtokóligin janynan soǵyp, dóńgelegin julyp ketken. Sondaı-aq ekpinin toqtata almaı aq tústi «Hıýndaı Aktsent» avtokóligi men 63-avtobýsty qaqqan. Osy qarqynmen elektr baǵanyna soǵylǵan «nemis» kóligi aǵashqa urylyp, trotýardan ary gúlzardyń ústinen bir-aq shyǵady.
Oqıǵa ornyna kelgen jedel járdem qyzmeti apatqa sebepshi «Mersedes» júrgizýshisin aýrýhanaǵa alyp ketti.
Basqa kóliktiń júrgizýshileri medıtsınalyq kómekten bas tartty.
Ázirge bul istiń aq-qarasyn tártip saqshylar anyqtaýda.
