Almatyda 3 aqpannan bastap Qytaıdan keletin reıster toqtatylady
NUR-SULTAN. QazAqparat – 1 aqpannan bastap Almatyda barlyq halyqaralyq reıs boıynsha sanıtarly-karantındik baqylaý kúsheıtildi.
Bul týraly Almatyda ótken brıfıng barysynda qalalyq taýarlar men qyzmetterdiń sapasy men qaýipsizdigin baqylaý departamentiniń basshysy Aızat Moldaǵasymova málim etti, dep habarlaıdy QazAqparat tilshisi.
Qazirgi tańda Almatyda koronavırýs ınfektsııasynyń aldyn alý jáne taralýyn boldyrmaý maqsatynda profılaktıkalyq sharalar legi júrgizilip jatyr. 2020 jyldyń 3 aqpanynan bastap Qytaıdan keletin barlyq reıster toqtatylady. QHR-dan keletin reısterdiń oqshaýlyq qaǵıdaty saqtalady. Qytaıdan keletin áýe kemeleriniń bári jeke turaqqa ornalastyrylyp, jolaýshylar men ekıpaj músheleri áýejaıdyń termınalymen baılanysy joq arnaıy aýmaqtan ótedi.
«1 aqpannan bastap barlyq halyqaralyq reıs boıynsha sanıtarlyq-karantındik baqylaý kúsheıtiledi. Álemniń 26 elinde koronavırýs juqtyrýdyń 160 jaǵdaıy tirkeldi. Búgingi tańda barlyq reıs qadaǵalanýda», - dedi Aızat Moldaǵasymova.
Sanıtarlyq-karantındik baqylaýdy kúsheıtýge 80 epıdemıolog pen 8 brıgada jumyldyrylǵan. Táýlik boıy 30 epıdemıolog barlyq reıs boıynsha jumys júrgizedi.
«Almaty halyqaralyq áýejaıy respýblıkadaǵy eń iri áýejaılardyń biri. Kúnine munda 50 reıs oryndalady. Bir ýaqytta 5 reıstiń oryndalatyn kezi de bolady. Dál osy reısterde koronavırýske kúdikti adamdarǵa qatysty sanıtarlyq baqylaý kúsheıtilgen», - dedi ol.
Aıta keterligi, áýejaıǵa kelgen adamdardyń bárine birden baqylaý ornatylady. Áýejaı jańasha tehnologııadaǵy teplovızormen qamtylǵan. Bortta temperatýrany 2-den 3 metrge deıingi qashyqtyqta janaspaı kórsetetin baılanyssyz teplovızor jumys isteıdi. Áýejaıda statsıonarlyq jylý túsirgishter bar. Olar tehnıkalyq parametrler boıynsha uzaq qashyqtyqta temperatýrany ólsheı alady. Sonymen qatar, koronavırýstyq ınfektsııaǵa kúdikti adamdardy tekserý úshin jeke jeldetý júıesi bar súzý aımaqtary qarastyrylǵan.
«Ushaqta olar tek tekserý júrgizip qana qoımaıdy. Sonymen qatar epıdemıologııalyq turǵydan qolaısyz elderden kelgeni jaıly anamnez jınap, saýalnamalar júrgiziledi, búkil reısterde kelgenderdiń bárine medıtsınalyq baqylaý tolyq kólemde júrgiziledi. DDSU málimetteri boıynsha, anamnez tek Qytaıdan keletin jolaýshylardan ǵana emes, sonymen qatar koronavırýstyq ınfektsııalar tirkelgen elderden kelgen basqa da jolaýshylardan jınaqtalady», - dep túsindirdi Aızat Moldaǵasymova.
Sonymen qatar, zerthanalyq zertteýler kataraldy qubylystardyń belgileri bolǵan jaǵdaıda ǵana júrgizilýi kerek.
«Barlyǵyna jalpy zerthanalyq dıagnoz qoıýdyń qajeti joq. Statıstıka kórsetkendeı, adamdardyń 99,9 paıyzynda JRVI, ártúrli shtamdar, al qalǵandarynda ártúrli sanattaǵy vırýstar (koronavırýs emes) anyqtalǵan», - dep atap ótti spıker.
Osy jyldyń 18 qańtarynan bastap Qytaıdan Almatyǵa 4904 adam kelip, olardyń 90 paıyzy baqylaýǵa alynǵan. Atalǵan azamattardy medıtsınalyq uıymdardaǵy derekterin tabý jáne tekserý jumystary júrgizilýde.
Aızat Moldaǵasımova sonymen qatar barlyq klınıkada juqpaly aýrýlardyń belgileri bar adamdarǵa arnalǵan oqshaýlaǵyshtar ashylatynyn aıtty. Bul sheshim koronavırýstyq ınfektsııanyń aldyn alý jáne ýaqtyly anyqtaý úshin qabyldanǵan.
Almatyda eńbek etetin Qytaı azamattarynyń jaǵdaıyn tekserý boıynsha bólek jumystar júrgizilip jatyr. Barlyq kásiporynda, sonyń ishinde jataqhanalarda, qonaqúılerde, meıramhanalarda, dámhanalarda reıd júrgizilýde. Jalpy, Almaty qalasyndaǵy jaǵdaı turaqty.
Megapolıste koronavırýs juqtyrý faktisi tirkelgen joq. Vırýstyq aýrýlardyń aldyn-alý úshin Aızat Moldaǵasymovanyń aıtýynsha, jeke gıgıenanyń qarapaıym erejelerin saqtaý kerek: qoldy jýyp, halyq kóp jınalatyn oryndarǵa kóp barmaý, medıtsınalyq maska kııý, belgileri anyqtalǵan jaǵdaıda dárigermen keńesý jáne ımmýnıtetti kóterý. Qajetti aqparatty alý úshin 1406 Call-ortalyǵyna táýlik boıy habarlasýǵa bolady.
Elaman Turysbekov
