Almatyda 29 úı jaryqsyz otyr: Ákimdik jaǵdaıǵa túsinik berdi
ALMATY. QazAqparat - Naýryzbaı aýdanyndaǵy «Premera» turǵyn úı kesheni jaryqsyz qaldy. Turǵyndar elektr qýaty jıi óshetinine shaǵymdanýda. Aýdan ákimdigi jaǵdaıǵa qatysty túsinik berdi, dep habarlaıdy QazAqparat tilshisi.
Atalǵan turǵyn úı kesheniniń turǵyndary qala basshylyǵyna Facebook arqyly júgindi.
«Premera» qaladaǵy iri turǵyn úı keshenderiniń biri. Búgin tańerteń 2 myńnan astam páter elektr qýatynan tolyq ajyratyldy. 4 jyldan beri osy keshenniń elektr jelilerin qalalyq jelilerdiń balansyna berý týraly sot protsesteri júrip jatyr. Turǵyndardyń elektr qýatyna qaryzdary kóp deıdi. Biraq kórshilerim de, men de únemi jaryq úshin aqsha tóleımiz. Nege bereshegi bar páterlerdi jaryqtan ajyratpaıdy. Munda14-16 qabatty 29 úı jaryqsyz qaldy. Bul degenimiz - sý men tamaq joq degen sóz. Keshenniń bári elektr qýatymen baılanysty. Balalar onlaın oqı almaı otyr. Birneshe boryshkerdiń kesirinen búkil keshendi jaryqsyz qaldyrý - bul tikeleı adam quqyǵyn buzý», - dep jazdy jeli qoldanýshy.
Naýryzbaı aýdanynyń ákimdigi elektr energııasymen qamtý qyzmetin jetkizýge kelisimshart jalpy eseptegish qural boıynsha jasalǵanyn habarlady.
«Almatyenergosbyt» JShS páter ıelerimen jeke kelisimshart jasaǵan joq.
«Qazirgi ýaqytta elektr energııasyn qosý máselesi qarastyrylýda. Sonymen qatar, Almaty qalasynyń Energııa tıimdiligi jáne ınfraqurylymdy damytý basqarmasy elektr jelileri men qurylystaryn «AJK» AQ balansyna berýdi qarastyryp jatqanyn habarlaımyz. Ýaqytsha qolaısyzdyq úshin keshirim suraımyz», - dep jaýap berdi ákimdik.
