Almatyda 28 panfılovshy saıabaǵyndaǵy mańdaısha men áripterdi urlaǵandar ustaldy
ALMATY. QazAqparat - Almaty polıtsııasy Batyrlar alleıasynyń mańdaıshalaryn urlaǵandardy ustady, dep habarlaıdy QazAqparat tilshisi.
Eske salaıyq, 28 gvardııashy-panfılovshy atyndaǵy saıabaqta Batyrlar alleıasynyń tuǵyrynan eki árip pen 13 mańdaıshanyń urlanǵany 4 naýryzda belgili boldy.
Qylmystyq is QR QK-niń 188-baby 1-bóligi boıynsha sotqa deıingi tergeýdiń biryńǵaı tizilimine tirkeldi.
– Bul qylmysty ashý úshin arnaıy jedel-tergeý toby quryldy, onyń quramyna qalanyń krımınaldyq polıtsııasynyń qyzmetkerleri de kirdi. Urylar birden anyqtaldy. Sondaı-aq, qysqa merzimde olar aıdaǵan kólikti anyqtaý múmkin boldy. Kúdiktiler – úsheý, olar 25 jáne 26 jasta. Kúdiktiler – Almaty oblysy Eńbekshiqazaq aýdanyna qarasty aýyldardyń biriniń turǵyndary. Qylmyskerler ustalyp, qamaýǵa alyndy. Olar shoıyn mańdaıshalar men áripterdi qabyldaý pýnktine ótkizý úshin urlap ketkenderin moıyndady. Biz urlanǵan múliktiń satylý baǵytyn jedel anyqtap, urlanǵan zattardy satyp alýǵa qatysy bar taǵy úsh aıyptalýshyny anyqtadyq. Olar da sol aýyldyń turǵyndary. Sońǵy oryn – Almaty qalasy Túrksib aýdanyndaǵy Bekmahanov kóshesi boıyndaǵy metall qabyldaý pýnkti. Batyrlar Alleıasynan alynǵan áripter men mańdaıshalardy eritýge daıyndaǵan, – dedi Medeý aýdandyqpolıtsııa basqarmasynyń bastyǵy Dáýren Ótebaev.
Zattaı aıǵaqtar tárkilendi. Olardyń jalpy salmaǵy 44,5 keli boldy.
Satyp alýshylarǵa qatysty QR QK-niń 196-baby 1-bóligi, ıaǵnı qylmystyq jolmen alynǵan múlikti ıemdený deregi boıynsha qylmystyq is qozǵaldy.
Olar da ýaqytsha ustaý ızolıatoryna qamaldy.
