Almatyda 28 Panfılovshy saıabaǵynda vandalızm faktisi tirkeldi
ALMATY. QazAqparat- Almaty ákimdigi 28 Panfılovshy saıabaǵynda bolǵan vandalızmge qatysty túsinik berdi, dep habarlaıdy QazAqparat tilshisi.
«Qańtardaǵy jappaı tártipsizdik kezinde Gogol men Pýshkın kósheleri qıylysyndaǵy 28 Panfılovshy saıabaǵynda 9 sharshy metr granıt taqtaısha qıratylyp, kireberistegi jazýdyń 5 árpi urlanǵan bolatyn. Sondaı-aq máńgilik alaý mańynan 2 árip urlanyp, jaýyngerlerdiń aty jazylǵan 4 shoıyn eskertkish buzyldy. Qalpyna keltirý jumystary aqpan aıynda aıaqtaldy»,- habarlady qalalyq ákimdikten.
Alaıda qalpyna keltirý jumystary aıaqtalǵannan keıin 4 naýryz kúni saǵat 10:00-de Gogol kóshesi jaǵyndaǵy kireberiste taǵy 2 áriptiń jáne eskertkishten 8 shoıyn mańdaıshanyń joǵalǵandyǵy anyqtaldy.
Al, 5 naýryzda qoladan jasalǵan 2 áriptiń urlanǵany belgili boldy. Buzylǵan granıt pen joǵalǵan áripterdiń jalpy shyǵyny 5,7 mln teńge.
Qala ákimdigi atalǵan derekterdi Almaty qalasynyń Polıtsııa departamenti tirkep, saıabaqtaǵy tekseris jumystaryn kúsheıtkenin jetkizdi.
«Qalpyna keltirý jumystary 22 naýryzǵa deıin júrgiziletin bolady. Tarıhı eskertkishterge qatysty vandalızm faktileriniń jıilep ketkendigine baılanysty qala ákimdigi almatylyqtardy qala múlkine muqııat qarap, óz tarıhymyzǵa syılastyq tanytýǵa shaqyrady»,-delingen habarlamada.
