Almatyda 27 mektep aǵylshyn tilinde sabaq berýge kóshti
ALMATY. QazAqparat - Almatyda sarapshylar Oqýlyq jazý jáne oqytýdyń aǵylshyn tiline kóshý týraly ǵylymı semınar barysynda Almaty mektepterinde engizilip jatqan pılottyq jobalar týraly aıtty, dep habarlaıdy Qazaqparat tilshisi.
Bilim basqarmasynyń habarlaýynsha, qalada 27 mektepte eksperıment aıasynda oqytý aǵylshyn tiline kóshti.
Baǵdarlamada bıologııa, hımııa, fızıka, ınformatıka sabaqtary 8-klastarda aǵylshyn tilinde júredi.
Pılottyq jobaǵa 1116 bala qamtylǵan, 49 maman arnaıy oqytýdan ótken.
«Úsh toqsan ótti. Aǵylshyn tilinde oqytý kezeńimen júrgiziledi. Keı mektepterde termınologııasy oqytylsa, keıbirinde elementter engizilip jatyr. Lıngvıstıkalyq mektepterde oqýshylar pándi tereńirek túsinedi. Árıne, bul joba - alǵashqy qadam. Buǵan keı jaǵdaıda ata-analar, balalar túsinbeı jatady. Biraq bul kezeńnen de ótý kerek», - dedi qalalyq bilim basqarmasynyń bas mamany Qarlyǵash Ábdimanapova.
Onyń aıtýynsha, oqýshylar ustazdardan góri aǵylshyn tilin tez meńgeredi. Bul úshtildilikti engizýde basty problema. Óz pánin myqty biletin tájirıbeli ustazdar aǵylshyndy tez meńgerip kete almaıdy. Sol sebepti biz magıstratýra bitirgen stýdentterdi nemese shetelde oqyp kelgenderdi alýǵa tyrysamyz. Qazir 40 muǵalim kýrstan ótip jatyr. Qyrkúıekten bastap olar jańa júıemen sabaq beretin bolady», - dedi Q.Ábdimanapova.
Onyń aıtýynsha, kóptegen mektepter hımııa, bıologııa, fızıka pánderinen aǵylshyn tilindegi oqýlyqtarmen qamtyldy.
Aıta ketý kerek, elde 100 naqty qadam ult jospary aıasynda aǵylshyn tilinde oqytý júıesi júzege asyrylyp keledi.
