Almatyda 27 maýsym kúni bolǵan daýyldan kelgen zııan eseptelýde
ALMATY. 30 maýsym. QazAqparat /Názıra Eleýhan/ - Búgin Almaty qalasynyń ákimi Ahmetjan Esimov 27 maýsym kúni bolǵan daýyldan keıingi júrgizilip jatqan jumystarmen tanysty.
Esterińizge sala ketsek, Almatyda 27 maýsym kúni jergilikti ýaqyt boıynsha saǵat 2-de kúshti daýyl bastalyp, ol burshaq aralas jańbyrǵa ulasqan edi. Jeldiń qatty soqqany sonshalyq, ǵımarattardyń shatyry ushyp, aǵashtar qulady, on besten astam úıdi sý basyp, keıbir aýdandar jaryq pen gazsyz qalǵan bolatyn. Sonymen qatar, bul daýyldan Kishi Almaty shatqalynda 520 aǵash, Medeý shatqalynda 5 000, qala ishinde 161 aǵash qulady. Qala bılbordtary, jol belgileri men aıaldamalarǵa úlken zaqym keldi. Taýly aýdandarda jel kúshi sekýndyna 13-26 metrge jetse, qala ishinde jeldiń jyldamdyǵy 11 m/s boldy.
Qazirgi ýaqytta qala ishi retke keltirilip, Medeý shatqalynda daýyldyń saldaryn joıý boıynsha jumystar júrgizilýde. Taýly ústirti men Býtakovka shatqaly jáne Medeý aýmaǵyndaǵy jumystarǵa 326 adam men 21 tehnıka jumyldyrylǵan. Qala ákimdiginiń aıtýynsha, qazirgi ýaqytta daýyldan bolǵan zııan eseptelinýde.
Qala basshysy qalpyna keltirý jumystarymen tanysyp, zardap shekken aýmaqtardy kórip shyqty. Ol "Balbulaq" ońaltý ortalyǵy men "Alataý" sanatorııinde boldy. Bul emdeý mekemelerinde daýyl saldarynan ǵımarattyń shatyry synyp, qaqpalary qulap, terezeleriniń áınekteri synǵan bolatyn jáne aǵashtar da qulaǵan edi. Sol kúni bul eki orynnan 114 adam basqa jerge kóshirilgen bolatyn.
Sońǵy bir jarym aıda bul Almaty óńirinde bolyp otyrǵan ekinshi daýyl.
Birinshi daýyldan Іle Alataýy ulttyq parkinde 100 myń aǵash qulaǵan edi. Qazir bul aýmaqtan tek 1,5 myń aǵash shyǵaryldy.
