Almatyda 265 myń aǵash otyrǵyzylady
ALMATY. QazAqparat – Almatyda jasyl qordy saýyqtyrý boıynsha jumystar jalǵasýda , bıyl 265 myń aǵash otyrǵyzylady, dep habarlaıdy QazAqparat tilshisi.
«Aǵymdaǵy jyly 265 myń aǵash otyrǵyzý josparlanǵan. Birinshi kezekte oblysqa shekaralas ornalasqan Naýryzbaı jáne Alataý aýdandaryna erekshe nazar aýdarylatyn bolady. Qalanyń Jasyl ekonomıka basqarmasynyń málimeti boıynsha 2019 jyly #JasylAlmaty aktsııasy aıasynda 135 myń jasyl jelek otyrǵyzyldy. Aǵashtar kópshilik jınalatyn aýmaqtarǵa, onyń ishinde mektepterdiń, aýrýhanalardyń aınalasyna, «Mohnatka», «Kóktóbe» taýlarynyń bókterlerine, Atakenttiń, Atletter aýyly men «Alataý» teatrynyń alańdaryna otyrǵyzylady», dep habarlady Almaty ákimdigi.
Mamandar aýdandardaǵy jasyl jelekti sanap shyqty. Eń jasyl eldi meken Medeý aýdanynda 472 myńnan astam aǵash bar. Al, Naýryzbaı jáne Alataý aýdandarynda shamamen 202 myń jáne 179 myń aǵash ósip tur. Jasyldandyrý boıynsha ekinshi oryndy Túrksib aýdany ıelengen, munda 431,5 myń túp aǵash bar. Bostandyq aýdanynda 380 myń aǵash ósip tur. Al, Áýezov aýdanyndaǵy aǵashtar sany 100 myńǵa kem, ıaǵnı 255 myńǵa jýyq. Jetisý aýdanynda 220 myńnan astam, al Almaly aýdanynda 213 myń aǵash bar.
Aıta keterligi, tek kópshilik qoldanatyn jerdegi aǵashtar ǵana sanaldy. ıAǵnı, jeke aýmaqtardaǵy, zırattardaǵy, respýblıkalyq mańyzy bar jerlerdegi jasyl jelek qosylmaǵan.
Qalada barlyǵy 2,352 mln aǵash bar. Olardyń ishinde saýyǵyp,japyraqtaryn keńge jaıǵandary 1,8 mln nemese 76,5 paıyz. Sondyqtan aǵashtardy zııankesterden qorǵaý jáne saýyqtyrý úshin óńdeý jumystary júrýde. Preparattar aǵash japyraqtaryn kemiretin jáne soryp tastaıtyn zııankes qurttardan qorǵaýda. Bul óńdegish zattar - uzaq merzimdi ári qorshaǵan ortaǵa qaýipsiz.
«Jasyl jelekti óńdeý jumystary qorǵaýdyń bıologııalyq, qajet bolǵan jaǵdaıda hımııalyq ádisimen iske asýda. Óńdeý júrgizer aldynda 5-7 kún ishinde zııankesterdiń damý fenologııasyna, túrli zııankesterden taralýyna monıtorıng júrgiziledi», — dep habarlady qalanyń Jasyl ekonomıka basqarmasynan.
Jasyl jelekti óńdeý jumystary keshki saǵat 23:00-den tańǵy 05:30-ǵa deıin júrgiziledi.
Búgin Almatynyń jasyl qoryn óńdeýdiń ekinishi kezeńi bastaldy.
