Almatyda 26 oqýshy koronavırýs juqtyrǵan

ALMATY. QazAqparat – Almaty qalalyq Bilim basqarmasy basshysynyń orynbasary Qaırat Jumanov qalada qansha oqýshynyń koronavırýs juqtyrǵanyn málim etti, dep habarlaıdy QazAqparat tilshisi.

«Birinshi toqsanda 26 oqýshy koronavırýs juqtyrǵany anyqtaldy. Olardyń ekeýi shtattyq rejımde oqyǵan. Qaladaǵy epıdemıologııalyq ahýaldy eskere otyryp, balalardyń ata-analary mektepke jibergende qoǵamdyq orynǵa jibergenin túsingeni abzal. Ata-analar tarapynan barynsha ınfektsııany juqtyrmaýdyń amaldary jasalǵany durys»,- dedi Qaırat Jumanov.

Buǵan deıin qalanyń bas sanıtarlyq dárigeri Jandarbek Bekshın ekinshi toqsannan bastap 1-5 synyptarǵa kezekshi synyp ashýǵa ruqsat bergenin jazǵan bolatynbyz.

Al birinshi toqsanda 1-4 synyptarǵa ǵana ruqsat etilgen edi.

140 memlekettik mektepte 985 kezekshi synyby ashyldy. Bul synyptarda 12 928 bala oqyǵan.

56 jekemenshik mektepte 582 kezekshi synyby ashylyp, 7 056 bala bilim aldy.