Almatyda 26 myń jumys orny ashylady

ALMATY. QazAqparat – Bıyl «Jumyspen qamtýdyń jol kartasy» aıasynda 214 jobany júzege asyrý josparda. Munda 26 myń jumys orny ashylady. Bul týraly Almaty qalalyq ál-aýqat basqarmasynyń basshysy Rahat Shımasheva brıfıng barysynda málim etti, dep habarlaıdy QazAqparat tilshisi.

«Atap aıtqanda, jańadan 9 mektep boı kóteredi. 13 bilim mekemesine qosalqy ǵımarat salý josparda. 520 orynǵa arnalǵan 3 balabaqshanyń qurylysy bastalady jáne 95 mektepke deıingi mekeme kúrdeli jóndeýden ótedi. Sondaı-aq, №7 qalalyq aýrýhanany taǵy 64 tósekke keńeıtý kózdelgen»,– deıdi Rahat Shımasheva.

Sonymen qatar,ol birqatar jobalar ınjenerlik-kólik ınfraqurylymyn, TKSh jelilerin keńeıtý men jańǵyrtý, aýmaqtardy abattandyrý maqsatynda iske asyrylatynyn atap ótti.

«Mysaly, Naýryzbaı aýdanynda sýmen jabdyqtaýdyń jańa jelileriniń qurylysy bastalady. Sondaı-aq, Alataý, Túrksib aýdandarynda jol qurylysy júrgiziledi. Búginde barlyq aýdandardaǵy joldarda ortasha jáne aǵymdaǵy jóndeý jumystary bastaldy. Atap aıtqanda, 363 aýlaǵa kúrdeli jóndeý jáne qoǵamdyq aımaqtarǵa abattandyrý jumystary júrgiziledi. Jalpy, «Jumyspen qamtýdyń jol kartasy» aıasynda 26 myń adam jumyspen qamtylady «,- deıdi Almaty qalalyq ál-aýqat basqarmasynyń basshysy.

«Jumyspen qamtýdyń jol kartasy» iske asyrylǵannan keıin jańa nysandardyń qurylysy esebinen 2045 jańa turaqty jumys oryndary ashylady.