Almatyda 257 myń aǵash otyrǵyzylady
ALMATY. QazAqparat –Almatyda jasyl qordy saýyqtyrý boıynsha jumystar jalǵasýda, bıyl 257 myń aǵash otyrǵyzylady, dep habarlaıdy QazAqparat tilshisi.
Almaty qalalyq jasyl ekonomıka basqarmasynyń basshysy Natalıa Lıvınskaıanyń aıtýynsha, jyl sońyna deıin 257 myń aǵash otyrǵyzý josparlanǵan. Birinshi kezekte oblysqa shekaralas ornalasqan Naýryzbaı, Alataý jáne Jetisý aýdandaryna erekshe nazar aýdarylatyn bolady.
«Qalada barlyǵy 2,352 mln aǵash bar. Olardyń ishinde saýyǵyp, japyraqtaryn keńge jaıǵandary 1,8 mln nemese 76,5 paıyz. Ótken jyly qala ákimi Baqytjan Saǵyntaevtyń bastamasymen «Jasyl Almaty» aktsııasy qolǵa alyndy. Sonyń aıasynda ótken jyly kúzde 135 myń túp aǵash otyrǵyzyldy. Bıyl 8 myńǵa jýyq aǵash otyrǵyzdyq, jyl sońyna deıin taǵy 257 myń túp aǵash otyrǵyzýdy josparlap otyrmyz»,– dedi onlaın brıfıng barysynda Natalıa Lıvınskaıa.
Sonymen qatar, ol megopolıste aǵash otyrǵyzý jumystaryna jańa talaptar engizilgenin atap ótti.
«Qazir ujymdyq jáne kommertsııalyq uıymdar qaıyrymdylyq shara barysynda jıi aǵash otyrǵyzady. Mine, osyndaı jumystar úshin jańa ereje engizildi. Otyrǵyzylatyn aǵashtyń dıametri 3 sm, bıiktigi 3 metrden kem bolmaýy kerek. Taǵy bir másele aǵashty otyrǵyzýdan bólek ony kútip-baptaý jumystary bar. Jańa talapta otyrǵyzylǵan aǵashty eki jyl baptaý erejesi qarastyrylǵan. Bul jasyl jelektiń qaraýsyz qalmaı, ary qaraı jersinip, jaıqalyp ósip ketýi úshin jasalyp otyr. Sonymen qatar, qalada aǵash otyrǵyzatyn arnaıy aımaqtardy qarastyryp jatyrmyz»,– dedi ol.
Sondaı-aq, mamandar aýdandardaǵy jasyl jelekti sanap shyqan. Eń jasyl eldi meken Medeý aýdanynda 472 myńnan astam aǵash bar. Al, Naýryzbaı jáne Alataý aýdandarynda shamamen 202 myń jáne 179 myń aǵash ósip tur. Jasyldandyrý boıynsha ekinshi oryndy Túrksib aýdany ıelengen, munda 431,5 myń túp aǵash bar. Bostandyq aýdanynda 380 myń aǵash ósip tur. Al, Áýezov aýdanyndaǵy aǵashtar sany 100 myńǵa kem, ıaǵnı 255 myńǵa jýyq. Jetisý aýdanynda 220 myńnan astam, al Almaly aýdanynda 213 myń aǵash bar.
Aıta keterligi, tek kópshilik qoldanatyn jerdegi aǵashtar ǵana sanaldy. ıAǵnı, jeke aýmaqtardaǵy, zırattardaǵy, respýblıkalyq mańyzy bar jerlerdegi jasyl jelek qosylmaǵan.
