Almatyda 250 stýdentke dinı senimge qatysty zańdardyń normalary túsindirildi
Búgin Almatydaǵy Sport jáne týrızm akademııasynyń stýdentterimen kezdesý barysynda QR zańnamasyn buzǵan jaǵdaıda qandaı jaza bolýy múmkin ekendigi aıtyldy. Sabaqty 250 stýdent tyńdady.
Stýdentterdiń dinı saýatyn keńeıtýge baǵyttalǵan otyrysty akademııanyń 1-prorektory Muhtar Esqalıev júrgizdi.
Jıynǵa sarapshy retinde qatysqan dintanýshy, magıstr Nurmuhammed Meımanqoja Qazaqstannyń «Din týraly» zańnamasynyń normalarymen tanystyrdy. Bul sala Qazaqstan Respýblıkasy Dinı qyzmet jáne dinı birlestiker týraly Zańymen retteledi.
«Atalǵan zańdy buzǵan jaǵdaıda qandaı jaza bolatyny QR Ákimshilik quqyqbuzýshylyq kodeksiniń 490-babynda kórsetilgen. Dinı joralardy, rásimderdi jáne (nemese) jınalystardy ótkizýge, qaıyrymdylyq qyzmetti júzege asyrýǵa, dinı ádebıetti jáne dinı mazmundaǵy ózge de materıaldardy, dinı maqsattaǵy zattardy ákelýge, ázirleýge, shyǵarýǵa, basyp shyǵarýǵa jáne taratýǵa, ǵıbadat úılerin (ǵımarattaryn) salýǵa, úılerdi (ǵımarattardy) ǵıbadat úıleri (ǵımarattar) etip qaıta beıindeýge (fýnktsıonaldyq maqsatyn ózgertýge) belgilengen talaptardy buzý – qyzmetti úsh aı merzimge toqtata turyp, jeke tulǵalarǵa – 50, zańdy tulǵalarǵa 200 aılyq eseptik kórsetkish mólsherinde aıyppul salýǵa ákep soǵady», - dedi spıker.
Sonymen qatar Nurmuhammed Meımanqoja zaıyrly qoǵamda ózgelerdiń dinı kózqarasyna nuqsan keltirip, kelemejge aınaldyrǵan tulǵalar da zańmen qýdalanatynyn aıtty.
«Zańdy dinı qyzmetke kedergi keltirý, sol sııaqty jeke tulǵalardyń azamattyq quqyqtaryn dinge kózqarasy sebepteri boıynsha buzý nemese olardyń dinı sezimderin qorlaý ne qandaı da bir dindi ustanýshylar qasterleıtin zattardy, qurylystar men oryndardy búldirý, eger joǵaryda baıandalǵan barlyq áreketterde qylmystyq jazalanatyn is-áreket belgileri bolmasa jeke tulǵalarǵa – 50, laýazymdy adamdarǵa – 100, zańdy tulǵalarǵa 200 aılyq eseptik kórsetkish mólsherinde aıyppul salýǵa ákep soǵady», - dedi Nurmuhammed Meımanqoja.
Sonymen qatar, dáris berýshi «Jýsan» operatsııasy týraly da tilge tıek etti.
«Sırııaǵa 800-den astam qazaqstandyq ketken. 500-den astamy elge oraldy. Qazir olardy ońaltý jumystaryn psıholog, teolog mamandar júrgizip jatyr», - dedi ol.
Stýdentter tarapynan kóbinese «hıdjab», jat dinı aǵymdardyń belgileri, Hanafı mázhaby týraly saýaldar qoıyldy.
Jasóspirimderdiń biri osyndaı kezdesýdy taǵy da uıymdastyrýdy ótindi.
«Sońǵy jyldary qoǵamda halyqtyń dinge betburysy artýda. Kóptegen dinı dástúrler zamanaýı sándi trendke aınalýda. Halyqtyń belgili bir bóligine dinshildikti syrttaı pash etý, ıaǵnı dinı ómirdi jarııa etýge degen qyzyǵýshylyq tán. Dinge bet burǵan, alaıda dinı ilimderden beıhabar jáne sol sebepten destrýktıvti yqpalǵa erip ketetin jastardyń radıkaldaný qateri saqtalýda. Jekelegen azamattardyń qoǵam aldyndaǵy konstıtýtsııalyq jáne azamattyq boryshtarynan bas tartýy taǵy bar. Zańdarǵa, eldiń memlekettik rámizderine, halyqtyń ulttyq-mádenı salt-dástúrine, sondaı-aq jalpyǵa birdeı ádep pen minez-qulyq normalaryna qurmet tanytpaý jaǵdaılary jıilep barady», - dedi Nurmuhammed Meımanqoja.
Almatyda Qoǵamdyq damý basqarmasynyń úılestirýimen birneshe jyl boıy qala turǵyndary arasynda dinı ekstremızm men terrorızmniń aldyn alý maqsatynda aqparattyq-túsindirý toby qurylǵan.
Bul qurylym jastardyń, turǵyndardyń dinı ekstremızm, terrorızm, destrýktıvti uıymdardyń zııany týraly bilimin keńeıtip, adam men qoǵamǵa zııandy teris aǵymdardyń kózqarastaryn túsindirý, aqparattandyrýdy maqsat tutyp otyr.
Osy oraıda, aqparattyq-túsindirý tobynyń músheleri bıyl 600-den astam kezdesý, dáris, semınar, dóńgelek ústel ótkizý qarastyrylǵan.
Osyndaı formattaǵy túsindirý jumystary oń nátıje berip keledi. Turǵyndar sóılesýge kelgen mamandardan ózderiniń mazalap júrgen saýaldaryna jaýaptar alyp, tıisti aqparattyq keńester aldy.
