Almatyda 250.00 nysanyndaǵy deklaratsııany 30 myńnan astam adam tapsyrmaǵan
Almaty qalasy Memlekettik kirister departamentiniń málimetinshe, bıylǵy jyldyń 1 qańtarynan bastap jalpyǵa birdeı deklaratsııalaýdyń ekinshi kezeńi bastalǵan. Ekinshi kezeń sheńberinde jeke tulǵanyń aktıvteri men mindettemeleri týraly deklaratsııany 250.00 nysany boıynsha memlekettik mekemelerdiń, kvazımemlekettik sektor sýbektileriniń qyzmetkerleri, sondaı–aq olardyń jubaılary usynýy tıis.
«Almaty qalasy boıynsha jalpyǵa birdeı deklaratsııalaýdyń ekinshi kezeńi sheńberinde 152 484 jeke tulǵa deklaratsııa tapsyrýǵa mindetti. Deklaratsııany tapsyrý merzimi 15 qyrkúıekte aıaqtalady. Alaıda, 30 195 adam óz mindettemelerin áli oryndamady. Deklaratsııa usynbaǵan jeke tulǵalardyń jalpy sanynyń 61% - y nemese 18 440-y bilim berý, densaýlyq saqtaý, mádenıet jáne sport salasynyń qyzmetkerlerine, qalǵany kvazımemlekettik sektor qyzmetkerlerine tıesili», - dep habarlady Almaty qalasy Memlekettik kirister departamentiniń baspasóz qyzmeti.
Deklaratsııany elektrondy túrde «Salyq tóleýshiniń kabıneti» (cabinet.salyk.kz), «elektrondyq úkimet» portaly arqyly (egov.kz), sondaı-aq esalyq azamat mobıldi qosymshasynyń kómegimen tapsyrýǵa bolady. Sondaı-aq barlyq suraqtar boıynsha biryńǵaı baılanys ortalyǵyna 1414 nómirine habarlasýǵa bolady.
Aıta keteıik, deklaratsııany merziminde usynbaǵany úshin QR ÁQBtK ákimshilik jaýapkershilik qarastyrylǵan.
