Almatyda 25 myńnan astam adam jumysqa ornalasty

ALMATY. QazAqparat – Almaty qalalyq Jumyspen qamtý ortalyǵynyń dırektory Saǵyndyq Kenjebaev Óńirlik kommýnıkatsııalar qyzmetinde ótken brıfıng barysynda jastardy jumyspen qamtý máselesine qatysty saýaldarǵa jaýap berdi.

Sonymen qatar ol jastarǵa ózderine qajetti jumysty qaıdan jáne qalaı izdeý kerektigin, olarǵa osy baǵytta kimder, qandaı qoldaý kórsete alatyny týraly keńes berdi, dep habarlaıdy QazAqparat.

Spıkerdiń sózinshe, búgingi kúni jumys berýshiler elektrondy eńbek bırjasyna 4306-dan astam bos jumys oryndary týraly málimetterdi ornalastyrǵan.

Jyl basynan beri 25 221 adam jumysqa ornalassa, onyń 13 343-i turaqty, 11 878-i ýaqytsha jumysqa kirdi.

«Azamattar men jumys berýshilerge yńǵaıly bolý úshin 2018 jyldan bastap qyzmetterdi elektrondy formatqa kóshirýdi júzege asyrý bastaldy. Búgingi kúni barlyq qyzmetter onlaın túrde kórsetiledi, bul ótinish berýshini jumyssyz retinde tirkeý jáne jumysqa ornalasýǵa járdemdesýdiń belsendi sharalaryna joldama alý, jumys berýshi úshin bul bos jumys oryndaryn jarııalaý, kadrlardy irikteý, belsendi sharalarǵa qatysýǵa ótinish berý», - dedi Saǵyndyq Kenjebaev.

Sonymen qatar, ol bıyl 3 qazannan bastap 2023 jylǵa arnalǵan sýbsıdııalanatyn jumys oryndaryna qatysqysy keletin jumys berýshilerdiń ótinishterin qabyldaý bastalǵanyn aıtty. Qabyldaý aıdyń sońyna deıin júrgiziledi.

«Jumys izdeýshilerdi tartý maqsatynda Jumyspen qamtý ortalyǵynyń qyzmetkerleri jastar resýrstyq ortalyqtarymen birlesip, stıhııalyq «eńbek bırjalarynda», bazarlarda, halyq kóp jınalatyn oryndarda, jumyspen qamtýǵa járdemdesýdiń sharalary boıynsha túsindirý jumystaryn júrgizdi. Atap aıtqanda, «Altyn Orda» ámbebap bazary aýdanyndaǵy «Barlyq», «Baraholka», «Sary Arqa», Sholohov kóshesi boıyndaǵy «Almaty 1» sııaqty bazarlar qamtyldy», - dedi spıker.