Almatyda 25 mamyrdan bastap barlyq HQO men dámhanalar ashylady

ALMATY. QazAqparat – Almaty ákimdigi 25 mamyrdan bastap barlyq dámhana, meıramhana, HQO-lardy ashýdy josparlap otyr. Bul týraly qalalyq kásipkerlik jáne ınvestıtsııalar basqarmasy basshysynyń orynbasary Qanat Saǵyndyqov aıtty, dep habarlaıdy QazAqparat tilshisi.

«18 mamyrdan bastap týrızm, uıaly baılanystyń abonenttik bólimderi, bank bólimsheleri, qarjy sektory tolyq ashyldy. 25 mamyrdan bastap karantın rejımin bosańsytý aıasynda qaladaǵy barlyq saýda úılerin, saýda oıyn-saýyq ortalyqtaryn ashýdy josparlap otyrmyz. Qalada osyndaı 140 nysan bar eken. Sonymen qatar, meıramhana, dámhanalar da ashylady», - dedi ol.

Onyń aıtýynsha, mundaı mekemelerde kelýshilerdiń sanyna qatysty shekteý joq.

«Eń bastysy - sanıtarlyq talaptar tolyq oryndalýy tıis. Ústelderdiń arasy 2 metrden kem bolmaýy kerek. Bir ústelge bir otbasynyń 4 adamy ǵana otyrǵany abzal. Qoǵamdyq tamaqtaný oryndary 23:00-ge deıin ǵana ashyq turady. Biraq banket, toı jasaýǵa tyıym salynady»,- deıdi ol.

Sondaı-aq, Almatyda osy ýaqytqa deıin sanıtarlyq talaptarǵa saı kelmegen soń jabyq turǵan azyq-túlik bazarlary da ashylady.

«Bul ashyq tıptegi bazarlarda túsindirý jumystary júrgizildi. Senbi kúni aýdıt bolady. Odan bólek qaladaǵy barlyq qonaq úıler, HQO ashylady», - deıdi basqarma basshysynyń orynbasary.

Aýdıt aýdany 500 sharshy metrden asatyn nysandarda ǵana júrgiziledi.

«Qalalyq taýarlar men qyzmetterdiń sapasy men qaýipsizdigin baqylaý departamenti aýdany 500 sharshy metrden asatyn saýda oryndaryna qatysty talaptardy jarııalady. InfoAlmaty.kz saıtynda bári jazylǵan», - dedi Qanat Saǵyndyqov.

Onyń aıtýynsha, birinshi kezeńde saýda oıyn-saýyq ortalyqtarynda býtıkter, meıramhanalar, hımtazalaý ashylady.

Ekinshi kezeńde - qoǵamdyq tamaqtaný oryndary, ıaǵnı fýdkort, úshinshi kezeńde - kınoteatrlar, oıyn-saýyq alańdary ashylady.