Almatyda 24 jastaǵy jigitti ata-anasy bir apta boıy izdep jatyr
ALMATY. QazAqparat - Almatyda 24 jastaǵy jigitti ata-anasy bir aptadan beri izdep tappaı jatyr, dep habarlaıdy QazAqparat tilshisi.
Álıhan Ishımov jumbaq jaǵdaıda joǵalyp ketti. Jigittiń kóligi ashyq kúıinde Almaty áýejaıy mańyndaǵy kóldiń jaǵasynan tabylǵan. Telefony, qujattary, qundy zattary túgel ornynda qalǵan. Álıhannyń qaıda ketkeni belgisiz.
Jigittiń ata-anasy bir aptadan beri kúndiz kúlkiden, túnde uıqydan qalǵan.
«Balam 16 qarasha kúni keshki 10-da habarlasqan kezde «ıá, mama, kele jatyrmyn» degen bolatyn. Sol kúni túnde kelmedi. Kelesi kúni de tańerteń habarlassam telefonyn kótermeıdi. Habarlama jazdym, jaýap joq. Dostaryna, tanystaryna túgel habarlasyp shyqtyq. Tappaǵan soń izdeý jarııaladyq. Álıhan kelesi kúni jumysqa turýǵa sóılesýge barýy tıis bolǵan. Ol úıde eki uldyń kenjesi», - dedi anasy Gaýhar Ishımova.
Onyń aıtýynsha, Álıhan 16 qarasha kúni dostaryn úılerine jetkizip salǵan. Eń sońǵy tanysyn Alataý aýdanyndaǵy úıine aparyp salǵan.
«Sol balamen 10 qarasha kúni tanysqan eken. Dostary onymen kezdesip surastyryp keldi. Olardyń aıtýynsha, óte jaqsy adam emes. Jete tanymaıtyn adamdy úıine deıin aparyp tastaǵany qıyn boldy», - dedi anasy.
Ázirge Álıhandy izdeýmen eriktiler toby men otbasynyń týysqandary aınalysyp jatyr. Adamdar kóldiń mańaıyn súzip, qutqarýshylar sýdy túgel qarap shyqty.
Álıhannyń ata-anasy polıtsııanyń áreketsizdigine narazy.
Kólik Áýejaıy kóli mańynan tabylsa da izdeý týraly isti Alataý aýdanynda ashýǵa týra kelgen.
«Alataý aýdandyq ІІB-ni shaqyrttyq. Ázer kelip istedi. Sol kúni eshqandaı jumys bitpedi. Bir kún turdyq mynda. Olar ketkesin aýrýhana, máıithanalardy aralap kettik. Demalys kúnderi de tek ózimiz izdedik, polıtsııa saýsaǵynyń ushyn da qımyldatqan joq. Sodan dúısenbi kúni habarlassaq «biz qaramaımyz Túrksib aýdany ІІB-ne jiberemiz» dep tur. Seısenbi kúni Túrksib aýdandyq bólimshesinde «áli qujattar kelgen joq, oǵan 10 kún ótedi» dep otyr. Meniń ár kúnim, saǵatym azappen ótip jatyr. Mundaı nársege shydaı almaımyn», - dedi anasy Gaýhar Ishımova.
Qaıǵy jutqan otbasy balasynyń kelerine úmitti. Olar polıtsııadan tym bolmasa ıisshil ıtterdi berýlerin surap otyr.
Qalalyq ІІD joǵalǵan Álıhan Ishımovtyń izdeý týraly aryz qabyldanǵanyn rastady.
«Qazir Túrksib aýdandyq ІІB onyń aralasatyn tanystaryn tekserip jatyr. Іzdeý nátıjeleri týraly keıinirek habarlaıtyn bolamyz», - dedi qalalyq ІІD-niń resmı ókili Saltanat Ázirbek.
