Almatyda 23500 búldirshin mektep tabaldyryǵyn attamaq
ALMATY. QazAqparat - Bıylǵy oqý jylynda Almatyda 23500 búldirshin alǵash ret mektep tabaldyryǵyn attamaq. Bul týraly QazAqparat tilshisine qalalyq Bilim basqarmasy bastyǵynyń orynbasary Galına Samotokına aıtty.
«Bıyl ata-analardan balasyn birinshi synypqa berý týraly 23500 ótinish tústi. Bul kórsetkish jyldan-jylǵa artýda. Ótken jyly bul kórsetkish 22 myńdy qurasa, onyń aldyńǵy jyly 20 myńǵa jýyq búldirshin mektep tabaldyryǵyn attaǵan bolatyn. Týý kórsetkishiniń kóbeıýine baılanysty endi bul kórsetkish odan ári óse túsedi», - dedi ol.
Mamannyń aıtýynsha, bul kórsetkish áli de ózgerýi múmkin. Óıtkeni, kóptegen ata-analar balasyn mektepke berý týraly ótinishin keıinge qaldyryp jatady.
Galına Samotokına Almatyda jarııalanǵan «Bilim jyly» aıasynda 2014 jyldyń sońyna deıin qandaı aýqymdy jumystar jasalatynyn da aıtyp ótti.
«Birinshi kezekte 1-6 jastaǵy balalardyń 46,5%-yn, 3-6 jastaǵy balalardyń 61,5 %-yn mektepke deıingi bilim berýmen qamtý josparlanyp otyr. Osy maqsatta bıyl qalada 2760 orynǵa laıyqtalǵan 18 memlekettik, 400 oryndyq 8 jekemenshik balabaqshany paıdalanýǵa beremiz. Sondaı-aq, jyl sońyna deıin 4200 orynǵa eseptelgen jańa mektepterdi paıdalanýǵa berý kózdelip otyr. Sonyń biri - Túrksib aýdanynyń «Jas Qanat» shaǵyn aýdanynda salynyp jatqan 1200 oryndyq mekteptiń qurylysy aıaqtaldy. Memlekettik qabyldaý koıssııasynyń ǵımaratty qabyldaý aktisi de daıyn», - dedi G.Samotokına.
Onyń aıtýynsha, bıyl qala boıynsha 171 mektepte, sonyń ishinde bıyl qosylǵan aımaqtardan 15 mektepte jóndeý jumystary júrgizildi.
