Almatyda 23 jastaǵy jas jigit joǵalyp ketti
ALMATY. QazAqparat - Almatyda 23 jastaǵy jas jigit iz-túzsiz joǵalyp ketti, dep habarlaıdy QazAqparat tilshisi.
Álisher Nurmuhambetovti jaqyndary 16 maýsymnan beri tappaı otyr. Uıaly telefony óshirýli.
Jigittiń ápkesi Nurmuhambetova Makıranyń aıtýynsha, inisi Dostyq kóshesi boıyndaǵy meıramhanalardyń birinde jumys istegen.
Nurmuhambetovter otbasy Taldyqorǵanda turady. Ata-anasynyń jalǵyz uly Álisher Almatyǵa birneshe jyl buryn jumys isteýge kelgen. Áke-sheshesi eresek balasynyń ómirine óte kóp aralaspaıdy eken.
«Sońǵy ret áriptesteri ony 16 maýsymda kórgen. Jalaqysyn alyp ketken. Sodan ony eshkim kórmedi. Almatyda ol týysqandarymyzben turatyn. Olar da 20-maýsymnan bastap dabyl qaǵyp jatyr», - dedi ápkesi Makıra.
Onyń aıtýynsha, Álisherdiń eshqandaı jaman ádeti joq. Dostarynyń bári jaman ádetten aýlaq jandar.
Nurmuhambetovter otbasy erteń balasynyń joǵalǵany týraly polıtsııaǵa habarlasýǵa Almatyǵa jol tartpaq.
Olar balasynyń aman-esen tabylaryna úmitti.
