Almatyda 23 jasar ana úshem týdy
ALMATY. QazAqparat - Almatyda 23 jasar kelinshek 11 aqpanda úsh qyzdy qatar dúnıege ákeldi. Búgin baqytty otbasy Almatydaǵy qalalyq perınataldy ortalyqtan úıine shyqty.
Aıta ketý kerek, Ánel, Ázel, Ádel esimdi úsh qyzdy úıinde 3 jasar aǵalary Aldııar kútip otyr. Óziniń erekshe jaǵdaıyn Aıjan Mýsına júktiliktiń 6-7 aptasynda bilgen. Sodan beri otbasy kóz tıedi dep dárigerlerden basqa jan balasyna qupııasyn ashpaǵan. Balalardyń ájesiniń aıtýynsha, otbasynyń tuqymynda egizden, úsheýden týǵan analar bolǵan. Tek olardyń kópshiligi medıtsınanyń álsizdiginen shetinep ketken. «Alǵash tekserilgen kezimde egiz dep aıtqan bolatyn. Júrek soǵysyn baqylaý kezinde úshinshi júrektiń lúpili estilgen soń meniń úshem kóterip júrgenim belgili boldy. Qatty tolqydym», - dedi A.Mýsına. Bosanǵanyna 16 kún ótse de Aıjan sábıleriniń qaısysy kim ekenin ajyrata almaıdy. Mamandar úshemniń týýyn bıylǵy jylǵy tirkelgen alǵashqy jaǵdaı ekendigi jetkizdi. «Bizdiń ortalyqta shala, ýaqytynan buryn, belgili bir patologııamen týylǵan balalarǵa kútim jasalady. Sonyń ishinde egiz, úshem týatyndar da bizge jiberiledi. Bizde osy turǵyda tájirıbe mol. Byltyrdyń ózinde ortalyq 350 egiz ben 4 úshemdi qabyldaǵan bolatyn. Olardyń ishinde eki kelinshek jasandy uryqtandyrý qyzmetine júgingen. Osy jaǵdaıda 23 jasar kelinshektiń úshem kóterýi tabıǵı jaǵdaı. Negizinen jasy kelgen áıelder egiz týýǵa beıim keledi», - dedi qalalyq perınataldyq ortalyq dırektorynyń orynbasary Saltanat Erbolatova. «Balalar óte aýyr jaǵdaıda týyldy. Alǵashynda jan saqtaý bóliminde biraz jatty. Keıin óz kúshimen demala bastady. Balalardyń barlyǵynyń salmaǵy 2 keliden asady. Ózderin óte jaqsy sezinip jatyr. Sondyqtan, búgin olardy perzenthanadan shyǵaramyz», - dedi jańa týǵan balalardyń patologııasy bóliminiń meńgerýshisi Svetlana Lısogor. Jalpy qala boıynsha byltyr 450 egiz ben 4 úshem týǵan. «ÝZD tekserýinde dárigerler úshem bolatynyn birden aıtty. 9 aı boıy qupııamyzdy eshkimge ashpadyq. Júktilik boıy túsik tastaý qaýpi boldy. Únemi dárigerlerdiń baqylaýynda boldyq. Emizgen kezde ǵana kishkene qıyndyq týady. Birin anasy emizse, ekeýin jasandy sútpen tamaqtandyramyz. Árqaısysy óz kezegin kútip jatady», - dedi qyzdardyń ájesi Baqyt Mýsına. Eń jas kópbalaly otbasy qazir Áýezov aýdanynda turady. Úshemniń týǵany jaıly perzenthana basshylyǵy barlyq quzyrly organdarǵa habarlady. 23 jastaǵy Aıjan Mýsına qalanyń mektepteriniń birinde psıholog bolyp qyzmet etken. Balalardyń ákesi menedjer bolyp jumys jasaıdy. Ázirge otbasynda jeke baspana joq.
