Almatyda 23 myńnan astam adam turaqty jumyspen qamtyldy

ALMATY. QazAqparat- 2020 jyly Almatyda 23 897 adam turaqty jumysqa ornalastyryldy. Bul týraly Almaty qalasy Áleýmettik ál-aýqat basqarma basshysynyń orynbasary Danııar Álkebaıuly onlaın brıfıng barysynda aıtty, dep habarlaıdy QazAqparat tilshisi.

Danııar Álkebaıuly atap ótkendeı, 2020 jyly jumyssyz azamattardy turaqty jumysqa ornalastyrý «Eńbek» memlekettik baǵdarlamasynyń úsh baǵytta boıynsha júzege asty.

Onyń aıtýynsha, memlekettik baǵdarlamalar boıynsha – 735 adam, eńbek portaly arqyly – 11 403 adam jáne memlekettik qoldaý sharalarynsyz – 11 759 adam jumyspen qamtyldy.

«Memlekettik jáne úkimettik baǵdarlamalar sheńberinde 76 301 jańa jumys orny quryldy, onyń 35 032-si turaqty. Daǵdarysqa qarsy sharalar sheńberinde Jumyspen qamtýdyń jol kartasy iske asyrylýda. Ondaǵy 228 ınfraqurylymdyq jobada 26 myń jumys ornyn qurý kózdelgen, bıýdjeti 104 mlrd teńge», - dedi ol.

Sonymen qatar, ol qurylǵan jumys oryndarynyń 50%-y halyqty jumyspen qamtý ortalyǵy arqyly jumyssyzdardy jiberý esebinen qamtamasyz etilgenin jetkizdi.

«Barlyǵy 21,8 myń jumys orny quryldy. Jumyspen qamtý ortalyǵy arqyly 11 myńǵa jýyq adam jumysqa ornalastyryldy. Jumysqa ornalastyrylǵan jastardyń úlesi 37%-dy quraıdy, ıaǵnı 4 054 adam. Qyzmetkerlerdiń ortasha jalaqy mólsheri 92 myń teńgeni quraıdy», - deıdi Danııar Álkebaıuly.