Almatyda 22,7 adamǵa ataýly áleýmettik kómek taǵaıyndaldy
ALMATY. QazAqparat - Almatyda 2021 jyldyń 7 aıynda 55 myń adam áleýmettik tólemniń 17 túrimen qamtyldy. Qoldaýdyń bir túri – ataýly áleýmettik kómek. Áleýmettik ál-aýqat basqarmasynyń basshysy Nazıra Toǵyzbaeva megapolıste AÁK-ti kimder alatynyn aıtty, dep habarlaıdy QazAqparat tilshisi.
Basqarma basshysy atap ótkendeı, ataýly áleýmettik kómek otbasynyń ár múshesine shaqqandaǵy tabys eń tómengi kúnkóris deńgeıiniń 70%-nan (27 112 teńge) aspaıtyn otbasylarǵa tólenedi.
«Ataýly áleýmettik kómekti – kópbalaly otbasylar, jalaqysy tómen jumys isteıtin azamattar, zeınetkerlerge, múgedekterge jáne basqa da muqtaj jandarǵa qaraıtyn otbasylar alady. AÁK mindeti – jumysqa ornalasý jáne qıyn ómirlik jaǵdaıdan shyǵý. Sondyqtan olar jumyspen qamtý ortalyǵyna jiberiledi, bul olardyń materıaldyq jaǵdaıyn jaqsartýǵa múmkindik beredi», - dedi spıker.
Onyń aıtýynsha, jyl basynan beri AÁK Almaty qalasynyń 22,7 myń az qamtylǵan azamattaryna 1,1 mlrd teńge kóleminde kómek kórsetildi.
«2020 jyldan bastap 1 jastan 6 jasqa deıingi balalary bar AÁK alýshylarǵa gıgıenalyq quraldar, turmystyq hımııa men balalar taǵamdary kiretin kepildendirilgen áleýmettik paket beriledi. Joba Magnum saýda jelileri arqyly júzege asady. Kelisimshart somasy 8 656 balany qamtamasyz etý. Oǵan 607 mln teńge bólindi. Búginde 5,5 myń bala qamtamasyz etildi», - dep qosty Nazıra Toǵyzbaeva.
Sonymen qatar, AÁK alýshylaryna teledıdar men gaz jabdyǵy beriledi. Taǵy 27 myń adamǵa 1,8 mlrd teńgege áleýmettik tólemniń basqa túrleri usynylady.
Sonymen qatar, Áleýmettik ál-aýqat basqarmasy az qamtylǵan otbasylarǵa, kópbalaly otbasylarǵa, jalǵyzbasty zeınetkerlerge, múgedek balalary bar otbasylarǵa qaıyrymdylyq kómek kórsetý úshin demeýshilermen, metsenattarmen jáne jurtshylyqpen belsendi jumys isteıdi.
Bıyl 127 867 otbasy qaıyrymdylyq kómekpen qamtyldy, olarǵa kıim, aıaq kıim, turmystyq tehnıka, ystyq tamaq, múgedek arbalary berildi.
