Almatyda 21 myńǵa jýyq úı sýmen jabdyqtaý júıesine qosylady
ALMATY. QazAqparat - Almatyda bıyl 21 myńǵa jýyq úı sýmen jabdyqtaý jáne sý burý júıesine qosylady. Bul týraly onlaın brıfıng barysynda qalalyq energotıimdilik jáne ınfraqurylymdyq damý basqarmasy basshysynyń orynbasarynyń mindetin atqarýshy Berik Jambylov aıtty, dep habarlaıdy QazAqparat tilshisi.
«Almaty-2020» damý baǵdarlamasy aıasynda 2020 jyly 33 joba boıynsha 312 shaqyrym sý qubyry jáne káriz jelileri salyndy.
«Qurylystyń aıaqtalýy Almaty qalasyna qosylǵan eldi mekenderdegi 23 myńǵa jýyq turǵyn úıdi onyń ishinde «Dýman», «Samǵaý» jáne «Aqbulaq» kentterin qamtýǵa múmkindik berdi», - deıdi Berik Jambylov.
Onyń aıtýynsha, qazirgi kezde qala turǵyndarynyń 98,3 %-y ortalyqtandyrylǵan sýmen qamtylǵan, sý burý jelilerine 85,7%-y qol jetkizdi. 2019 jylmen salystyrǵanda sýmen qamtýdyń oń dınamıkasy 0,6%-ǵa ósti. 2020 jyly 17 yqshamaýdanda bastalǵan barlyq jumystardy bıyl aıaqtaý josparlanýda.
«2021 jyly «Quramys», «Jaılaý», «Taýjoly», «Kolhozshy», «Álmerek», «Kemel», «Alǵabas», «Boraldaı», «Shuǵyla», «Aqjar», «Qaırat», «Samǵaý», «Qarasý», «Shapaǵat», «Terekti», «Shańyraq-1», «Kókshoqy» yqshamaýdanynda 150 shaqyrym sýmen jabdyqtaý jáne 130 shaqyrym sýdan burý jelilerin salý josparlanýda. Osylaısha, ortalyqtandyrylǵan sý júıesine 20 900 úı qosylady», - dep atap ótti spıker.
