Almatyda 2040 jylǵa qaraı LRT, BRT metro jelileri uzarady
ALMATY. QazAqparat- Almatynyń 2040 jylǵa deıingi Bas josparyn ázirleýshiler qoǵamdyq kólikti damytý perspektıvalary týraly aıtty, dep habarlaıdy QazAqparat tilshisi.
«Almatybasjospar» ǴZI» JShS bas dırektory, Bas jospardy ázirleýshi Ashat Sadýovtyń aıtýynsha, qoǵamdyq kólik dálizderin (BRT, LRT, metro) uıymdastyrý jáne jaıaý júrginshiler kirý aımaǵynda arnaıy jolaqtardy odan ári damytý qajet.
Qujatqa sáıkes, 2025 jylǵa qaraı qoldanystaǵy BRT jelisi «Shyǵys qaqpasy» polıortalyǵyna deıin uzartylady. Raıymbek dańǵyly boıymen jańa BRT jelisin iske qosý josparda. Osylaısha, júrdek avtobýstar jelisi 40 shaqyrymǵa uzarady.
2030 jylǵa qaraı BRT jelilerin Tilendıev, Rozybaqıev, Muqanov, Jumabaev kósheleri men Úlken Almaty aınalma jáne Qulja tasjoly boıymen 30 shaqyrymǵa deıin uzartý josparda. 2035 jylǵa qaraı – Ótegen batyr, Tátibekov, Soltústik aınalma jáne Sholohov kóshesiniń bólikteri qamtylmaq ( 20 km).
Al 2040 jyly júrdek avtobýstar jelisi taǵy 12 shaqyrymǵa uzartylady.
Jyldam avtobýs (BRT) jelileri jobasymen qatar metro jelisi de damıdy. Bas jospar boıynsha 2040 jylǵa qaraı metro jelisiniń uzyndyǵy 32 shaqyrymǵa jetpek. Búgingi tańda qoldanystaǵy jeli 13 shaqyrymdy alyp jatyr.
«Temirjol kóligine qatysty aıtar bolsam, megapolıste 3- shi vokzal paıda bolady. Ol Saın kóshesi men Buryndaı kóshesiniń qıylysynda ornalasady. Eger metro týraly aıtatyn bolsaq, onda bizge, birinshiden, «Barlyq» bazaryna (Altyn Ordy aýdany) baratyn joldy, ekinshi kezeńdi – Rysqulov boıymen, úshinshi kezeńdi – qalanyń tyǵyz ýchaskelerimen aıaqtaý kerek», – dedi», - Bas jospardy ázirleýshi Ashat Sadýov.
Sonymen qatar, aldaǵy ýaqytta qalada jeńil relsti kólik (LRT) iske qosylmaq. Onyń jelisi Tóle bı, Jeltoqsan, Raıymbek kósheleriniń boıymen ótedi. 2040 jylǵa qaraı onyń jalpy uzyndyǵy 76 shaqyrym bolady.
«Munyń barlyǵy qoǵamdyq kóliktiń qoljetimdiligin qamtamasyz etýge jáne jeke kólikpen júrý qajettiligin aıtarlyqtaı azaıtýǵa múmkindik beredi. Qazirdiń ózinde arnaıy jolaqtardyń kómegimen jaǵdaıdy jaqsartýǵa múmkindik bar»,- dedi Ashat Sadýov.
Foto: Almaty qalasy ákimdigi
