Almatyda 2020 jyly 2,4 mln sharshy metr baspana salyndy
ALMATY. QazAqparat - Almaty ákimi Baqytjan Saǵyntaev Ortalyq kommýnıkatsııalar qyzmetinde ótken brıfıng barysynda turǵyn úımen qamtamasyz etý sharalary jáne turǵyn úı qurylysynyń qarqyny týraly aıtty, dep habarlaıdy QazAqparat tilshisi.
Almaty ákiminiń málimetinshe, 2020 jyly qalada 2 mln 396 myń sharshy metr turǵyn úı paıdalanýǵa beriledi — bul 22 626 páter, 2062 jeke turǵyn úı. Onyń ishinde «Nurly Jer» memlekettik baǵdarlamasy aıasynda — 290 myń sharshy metr turǵyn úı, bul 5 206 páter.
«7-20-25» jeńildetilgen ıpotekalyq nesıelendirý baǵdarlamasyn júzege asyrý jalǵasýda, osy arqyly 76,5 mlrd tg somasyna 5605 páter alý maquldandy.
Bıyl Almaty ákimdigi bilim jáne ǵylym, BAQ, áleýmettik qyzmet kórsetý salalarynda qyzmet etetin 35 jasqa deıingi jastarǵa arnalǵan «Almaty Jastary» atty jeńildetilgen ıpotekalyq nesıelendiretin jeke baǵdarlamasyn iske qosty.
Baǵdarlama boıynsha bastapqy jarna páterdiń jalpy qunynyń 10%-yn quraıdy. Kredıttik shart jyldyq 5%-ben 25 jyl merzimge resimdeledi. Jeńildetilgen sharttardyń arqasynda medıtsına qyzmetkerleri, muǵalimder, JOO men ǴZI oqytýshylary men ǵylymı qyzmetkerleri, mádenıet jáne sport salasynyń qyzmetkerleri, jýrnalıster, jazýshylar, halyqty áleýmettik qorǵaý salasyndaǵy qyzmetkerleri arasynan 894 almatylyq jas kópten kútken baspanasyn aldy.
Jyl sońyna deıin taǵy bir myń jas baspanaly bolady.
Kelip túsken ótinishterdiń sanyn eskere otyryp, bul qala jastary tarapynan suranystyń artqanyn kórsetedi, baǵdarlamany iske asyrý kelesi jyly da jalǵasady.
