Almatyda 2020 jylǵa deıin 42 jataqhana paıdalanýǵa beriledi
Qala ákimi jıyn barysynda ótken jyly atqarylǵan jumystardyń nátıjelerimen tanysyp, joba jetekshilerine birneshe tapsyrma júktedi.
«Memleket basshysynyń tapsyrmasy boıynsha stýdent jastardyń jaǵdaıyn jaqsartý maqsatynda Almatyda 1200 oryndy 3 jataqhana salyndy, onyń bireýi modernızatsııalanǵan. Jyl sońyna deıin 2680 oryndy 5 jataqhana qurylysy aıaqtalady jáne 6300 oryndy 12 jataqhana qurylysy qatar júredi. Jalpy, 2020 jylǵa deıin 19 480 oryndyq 42 jataqhana salynyp, paıdalanýǵa beriledi», - dedi Almaty qalasy ákiminiń baspasóz qyzmetinde.
Sonymen qatar, Almaty qalasy ákiminiń baspasóz qyzmetinde bilim salasynda da oń dınamıka qalyptasyp, jańa mektepter men memlekettik balabaqshalar boı kótergenin málimdedi.
«Qalaǵa qosylǵan eldimekenderdegi ıntensıvti mıgratsııa men týý qarqyny esebinen mekteptegi oryn jetispeýshiligi men balabaqsha kezegin azaıtý úshin ótken jyly Naýryzbaı aýdanynda 1200 oryndyq mektep paıdalanýǵa berildi. Úsh mektep janynan 1400 oryndyq qosalqy nysandar jáne 730 oryndyq úsh memlekettik balabaqsha iske qosyldy. Budan ózge, jyl qorytyndysy boıynsha 2,5 myń oryndyq 6 jeke mektep jáne 4936 oryndyq 170 jeke balabaqsha ashyldy. Qańtar aıynyń sońynda 440 oryndyq taǵy eki memlekettik balabaqsha paıdalanýǵa beriledi. Alataý aýdanynda 600 oryndyq mektep jáne 360 oryndyq 3 memlekettik balabaqsha salynýda. Memlekettik-jekemenshik áriptestik jáne bıznestiń áleýmettik jaýapkershiligi aıasynda oqýshylar tyǵyz ornalasqan ortalyqtaǵy 4 mektep janynan qosalqy oqý korpýstary salynady», - dep málim etti baspasóz qyzmeti.
Sondaı-aq, jıyn barysynda Almaty ákimi qalany gazdandyrý qarqyny, sonyń ishinde jeke sektorǵa gaz berý týraly aqparatty tyńdady. Qala ákiminiń orynbasary Almas Mádıev gaz jelisine abonentterdiń 99% qosylǵanyn, jeke sektordyń nebári 1 paıyzyn quraıtyn 2217 turǵyn úıdiń 200-ine gaz berilgenin, taǵy 1000 úıge gaz jelisiniń tartylǵanyn, qalǵan 1017 úı bıylǵy jyldyń úshinshi toqsanynda gaz jelilerine qosylatynyn aıtty.
Degenmen, Baýyrjan Baıbek tıisti ınfraqurylymdy júrgizip qana qoımaı, jeke sektordyń gazǵa tolyq kóshýin qamtamasyz etýdiń erekshe mańyzdy ekenin atap ótti. Qazirgi kezde keı turǵyndar úılerin aýaǵa zalaldy materıaldarmen, sapasyz kómirmen, rezeńkemen jáne basqalarmen jylytyp otyr. Qala ekologııasyn túbegeıli jasqartý qajettiligin eskere otyryp Almaty ákimi tabıǵatty qorǵaý prokýratýrasymen birge osy máseleni tekserýdi tapsyrdy.
Aıta keterligi, barlyq kompanııalarmen gaz jelisine qosý baǵasyn tómendetý boıynsha kelisim jasaldy. Áleýmettik jaǵdaıy tómen turǵyndarǵa jeńildik qarastyrylǵan. Mysaly, UOS qatysýshylaryna gaz tegin júrgiziledi, jaǵdaıy tómen otbasylar men kópbalaly analarǵa 50%, I, II toptaǵy múgedekterge 30% jeńildik jasalady», - delingen baspasóz habarlamasynda.
Elaman Turysbekov
