Almatyda 2018 jylǵy maýsymdaǵy sońǵy velosherý ótti
ALMATY. QazAqparat - Búgin «Sporttyq Almaty» baǵdarlamasy aıasynda velosherýdiń jabylý maýsymy ótti, dep habarlaıdy QazAqparat.
Almaty qalasynyń aqparattyq jáne sporttyq HAB-ynan málim etkendeı, nashaqorlyqqa qarsy kúres kúnine arnalǵan velosherýge 1 myńǵa jýyq adam qatysty. Dástúr boıynsha velosherý «Nurly Taý» bıznes ortalyǵynyń aýmaǵynan bastalyp, Tuńǵysh Prezıdent saıabaǵynda aıaqtaldy.
Máreni kesip ótken barlyq qatysýshylardyń arasynda baǵaly syılyqtar men 10 velosıped oınatyldy. Eki dóńgelekti temir tulpardyń jeńimpazdarynyń biri - bıyl velosherýlerdiń eshbirin jibermegen, turaqty qatysýshy Inna Baıdadorova.
«Bıylǵy jylǵy barlyq velosherýge qatystyq. Tipti Yssyqkóldegi demalysymyzdan kelip qatysyp júrdik. Otbasymyzben salaýatty ómir saltyn ustanamyz, endi biz konkı tebýge baramyz», - dedi 27 jastaǵy Inna.
Velosherýge Blind Race Astana - Paris velomarafonynan oralǵan «Shekarasyz sport» komandasynyń músheleri qatysty. Olar Astanadan Parıjge deıin 5 myń shaqyrymdy eńserdi. Sahnada olarǵa Almaty qalasy Dene shynyqtyrý jáne sport basqarmasynan alǵys hat pen baǵaly syılyqtar tabys etildi. «Shekarasyz sport» qozǵalysynyń basty maqsaty - múmkindigi shekteýli jandar arasynda sportty qoldaý jáne olardy sportqa baýlý.
Velosherý sondaı-aq belgili sport jýrnalısti Galına Polevaıany qoldaý maqsatynda ótti. G.Polevaıa 20 jyl boıy «Habar» telearnasynda tilshi bolyp qyzmet atqarǵan. Qazirgi tańda Galınanyń densaýlyǵy nasharlap, ol onkologııalyq aýrýmen kúresip jatyr. Ol qymbat operatsııaǵa muqtaj. Búgingi aktsııada árkim tilshiniń otbasyna qoldaý kórsetip, emdeýge qarajat jınaý úshin óz úlesin qosýǵa múmkindik aldy.
Aıta keteıik, dástúrli velosherýler buqaralyq sportty damytýǵa baǵyttalǵan «Sporttyq Almaty» aýqymdy qalalyq baǵdarlamasy aıasynda uıymdastyrylyp keledi.
