Almatyda 2017 jyly ótetin 28-shi qysqy Ýnıversıada oıyndaryna arnalǵan keri sanaq stelasy ashyldy (FOTO)
ALMATY. QazAqparat - Búgin Almaty qalasyndaǵy Balýan Sholaq atyndaǵy sport saraıynyń irgesinde 2017 jyly Almatyda ótetin 28-shi qysqy stýdenttik Ýnıversıada oıyndaryna 500 kún qalǵanyn bildiretin arnaıy stela ashyldy.
Saltanatty ashylý rásimine Almaty qalasy ákiminiń orynbasary Záýresh Amanjolova, «Almaty q. Halyqaralyq sport jobalary Dırektsııasy» Memlekettik Qorynyń dırektory Ilıa Orazaqov jáne qaladaǵy joǵary oqý oryndarynyń stýdent jastary, volonterlar men qala turǵyndary qatysty.
Óz sózinde Záýresh Jumanálıqyzy Almatyda mundaı stela osymen ekinshi ret ashylyp otyrǵandyǵyn aıtty.
«Ózderińiz bilesizder, biz Almatyda 2011 jyly qysqy Azııa oıyndaryn oıdaǵydaı ótkizdik. Soǵan 100 kún qalǵanda dál osy jerde arnaıy stelany ashqan bolatynbyz. Búgin minekı, dástúrli túrde, 2017 jyly ótetin qysqy Ýnıversıada oıyndaryna arnalǵan keri sanaq stelasyn ashqaly otyrmyz. Endi kúnde osy jermen ótetin qala turǵyndary men qonaqtary Ýnıversıadaǵa qansha kún qalǵanyn bilip júretin bolady. Ýnıversıadanyń bizdiń qala úshin mańyzy óte zor. Sonyń arqasynda búkil álem halqy bizdi jaqyn tanı túsedi. Qazaqstannyń bedeli artady. Al Ýnıversıada muralary bolyp sanalatyn sport nysandary keıin halyq ıgligine paıdalanylady. Jańa jumys oryndary ashylady. Elimizde sport oıyndary odan ári qarqyndy túrde damı túsedi», - dedi Z. Amanjolova.
Osydan keıin Záýresh Amanjolova, Ilıa Orazaqov pen 28-shi qysqy Ýnıversıada oıyndarynyń demeýshisi - LG kompanııasynyń vıtse-prezıdenti Lı San Hýn úsheýi stelanyń qyzyl lentasyn kesip, shymyldyǵyn ashty. Stela suńqar qustyń qaýyrsyndary túrinde jasalǵan. Sonymen, Almatyda ótetin qysqy Ýnıversıadaǵa búgin - 500 kún qaldy.
Esterińizge sala ketelik, Ýnıversıada oıyndary Almaty qalasynda 2017 jyly 28-shi qańtar men 8-shi aqpan aralyǵynda sporttyń 13 túrinen ótetin bolady. Olar: mánerlep syrǵanaý, short-trek, taý shańǵysy, snoýbord, bıatlon, shańǵy jarysy, shaıbaly hokkeı, kerlıng, shańǵymen tuǵyrdan sekirý, shańǵy qossaıysy, konkı jarysy, frıstaıl jáne dopty hokkeıdiń kórneki túri.
