Almatyda 2016 jyly buqaralyq sport túrlerin qarjylandyrý 20 esege artady - B. Baıbek
ALMATY. QazAqparat- Almatyda 2016 jyly buqaralyq sport túrlerin qarjylandyrý 20 esege artady. Bul týraly búgin Almatyda fýtboldan Qazaqstannyń Premer-Lıgasynda ekinshi oryn alǵan «Qaırat» komandasynyń oıynshylaryn birinshiliktiń kúmis medaldarymen marapattaý rásimi barysynda Almaty qalasynyń ákimi Baýyrjan Baıbek málimdedi.
«Aldaǵy bes jyl merzimge arnalǵan Almaty qalasyn damytý baǵdarlamasynyń jeti basymdy baǵytynyń biri - áleýmettik beıimdelgen qala. Almaty - bul sport pen týrızm jáne salamatty ómir saltyn ustanatyn azamattardyń qalasy. Biz 2016 jyldyń bıýdjetinde buqaralyq sport túrlerin qarjylandyrýdy 20 esege ulǵaıttyq. Bul, meniń oıymsha qalada sport túrleriniń jappaı damýyna serpin beredi. Sondaı-aq, kásipkerlerimizdiń arqasynda qalamyzda bıyl ondaǵan jańa fýtbol alańdary men balalar alańdarynyń qoldanysqa berilgenin aıta ketken jón», - dedi B. Baıbek.
Eger bıylǵy jyly Almatyda ár túrli deńgeıdegi sport sharalaryn uıymdastyrýǵa 23 mln. teńge bólinse, 2016 jyly qarjylandyrý kólemi - 500 mln. teńgeden asatyn bolady.
Aıta ketelik, búgingi saltanatty marapattaý sharasyna QR Mádenıet jáne sport vıtse-mınıstri Sáken Musaıbekov, «Qaırat» klýby Baqylaýshylar Keńesiniń tóraǵasy Qaırat Boranbaev, «Qaırattyń» ardager oıynshylary, QR fýtbol federatsııasynyń ókilderi, «Qaırat» fýtbol akademııasy tárbıelenýshileriniń ata-analary jáne basqa da múddeli tulǵalar qatysty.
