Almatyda 2015 jyly mezgilinde tólenbegen salyqtar kólemi 32 paıyzǵa azaıdy

ALMATY. QazAqparat - Almatyda mezgilinde tólenbegen salyqtar kólemi 25,7 mlrd. teńgeden 17,4 mlrd. teńgege, ıaǵnı 32 paıyzǵa azaıtyldy. Bul týraly búgin Almatyda ótkizilgen baspasóz brıfıngi barysynda Almaty qalasy boıynsha Memlekettik kirister departamenti jetekshisiniń orynbasary Jaıdar Іńkárbaev málim etti.

Onyń aıtýynsha, Almatyda ótken jyly kásiporyndar boıynsha barlyǵy 824 derekti tekserýler júrgizilgen.

«Memlekettik satyp alýǵa qatysýshylardy ákimshilendirý nátıjesi boıynsha 21 mlrd. teńgege qosymsha deklaratsııa usyný qamtamasyz etildi. Sondaı-aq, Almatyda jalǵan kásipkerliktiń jolyn kesý maqsatynda barlyq baǵytta tıisti sharalar qoldanylyp jatyr. Sonyń arqasynda bıýdjetke qosymsha 7 mlrd. teńge tólendi. Sotqa deıingi biryńǵaı tergeý tizimine 546 qylmystyq is tirkelip, 74 qylmystyq istiń óndirisi aıaqtaldy. 66 is sotqa jiberildi. Qalada 6 kásiporyn sot úkimimen jalǵan kásiporyndar bolyp tanyldy. Al ótelgen zalal - 11 mlrd. astam teńgeni qurady», - dedi J. Іńkárbaev.

Aıta ketelik, 2015 jyly Almaty qalasy tarapynan memlekettik bıýdjetke túsken túsimniń kólemi - 1 trln. 535 mln. teńgege jetken. Bul barlyq salyqtyq túsimderdiń úshten birin quraıdy.