Almatyda 2015 jyly kóshi-qon zańnamasyn buzǵany úshin 37 myńnan astam adam jaýapkershilikke tartyldy
ALMATY. QazAqparat- Almatyda 2015 jyly kóshi-qon zańnamasyn buzǵany úshin 37 myńnan astam adam jaýapkershilikke tartyldy. Bul týraly búgin Almaty qalasy ІІD baspasóz qyzmetinen habarlady.
«2015 jyly Almatyǵa 316 myń 709 shet eldik azamat keldi. Olardyń basym bóligi qurylys salasynda jumys isteıdi. Sonymen qatar, zańsyz mıgranttardyń kópshiligi bazarda saýda jasaıdy. Bul jerde qalada jasalatyn qylmystardyń 50 paıyzdan astamy basqa qaladan kelgenderdiń qolymen jasalatyndyǵyn aıta ketken jón. Deıturǵanmen, ótken jyly mıgranttarǵa jergilikti jeke tulǵalardyń qolynda eńbek etýleri úshin 15 757 bastapqy ruqsat qaǵazdar berildi. Al 6 myń 640 ruqsat qaǵaz uzartyldy.
«Almaty qalasy úshin mıgratsııalyq lek ózekti másele bolyp otyr. Shet eldikterge jumys isteýge beriletin ruqsat qaǵazdardyń artýy jáne zańsyz eńbek mıgratsııasynyń ósýine baılanysty bul sala qatań baqylaýǵa alyndy. Tek ótken jyldyń ishinde 37 myńnan astam shet eldik azamat ákimshilik jaýapkershilikke tartyldy. 1 myń 165 adam respýblıka aýmaǵynan shyǵaryldy. Bul derekter qalada mıgratsııalyq baqylaýdy kúsheıtýi talap etedi. Qazir osy saladaǵy kúndelikti jumysqa krımınaldy jáne kóshi-qon polıtsııasy ǵana emes, ýchaskelik polıtsııa qyzmetkerleri de jumyldyrylǵan», - dedi Almaty q. ІІD Kóshi-qon polıtsııasy basqarmasynyń bastyǵy, polıtsııa polkovnıgi Ashat Bútinshınov.
Almaty qalalyq ІІD kóshi-qon polıtsııasy bólimderi ótken jyly Іshki ister departamentiniń basqa da qyzmetterimen jáne jergilikti memlekettik organdarmen ózara yntymaqtasa otyryp, shet eldik azamattardyń kelýin baqylaý úshin birqatar keshendi sharalardy júzege asyrdy. Osy maqsatta «Quyqtyq tártip», «Mıgrant», «Zańsyz mıgrant» syndy jedel-aldyn alý sharalary oryndaldy.
