Almatyda 2015 jyly densaýlyq saqtaý salasyna 69,3 mlrd teńge bólindi - J.Qasymjanova
ALMATY. QazAqparat - Búgin Almatyda qalalyq densaýlyq saqtaý basqarmasy ótken jylda jetken jetistikterin qorytyndylady.
Basqarma basshysy Janat Qasymjanovanyń aıtýynsha, densaýlyq saqtaý salasyna bólingen 69,3 mlrd teńge tolyǵymen ıgerildi.
«2015 jyldy biz turaqty jetistiktermen qorytyndylap jatyrmyz. Respýblıkalyq Densaýlyq saqtaý ortalyǵynyń málimetine sáıkes 2015 jyldyń alǵashqy jartysynda biz alǵashqy úshtikten kóringen edik. Dúnıege kelgen almatylyqtardyń sany 4 %-ǵa artty. Júkti kelinshekterdiń 50 paıyzy Almaty perzenthanalarynda bosanýǵa tyrysady. Qala turǵyndarynyń jalpy ólim-jitim kórsetkishi 9 % boldy. Sábı ólimi 1,4 %-ǵa, ana ólimi 2 esege tómendedi. Bul elimizdegi eń úzdik kórsetkishter bolyp otyr. Almatylyqtardyń ortasha ómir súrý uzaqtyǵy 74,6 jasqa jetti. Respýblıka boıynsha bul kórsetkish 71,6 bolyp tur», - dedi basqarma basshysy Janat Qasymjanova.
Onyń aıtýynsha, oń serpinniń oryn alýynda qalanyń medıtsınalyq mamandarynyń eren eńbegi jatyr.
2015 jyly eki mańyzdy nysannyń qurylysy aıaqtaldy. Alǵabas jáne Túrksib aýdandarynda jańa eki emhana paıdalanýǵa berildi.
«Jedel járdem qyzmetin jetildirý jalǵasyp jatyr. Shuǵyl kómek kórsetetin brıgadalardyń sanyn arttyrdyq. Bizdiń jedel járdem zamanaýı spýtnıktik navıgatsııa quralymen qamtylǵan. Shaqyrtý mekenjaıy júrgizýshiniń kartasynda avtomatty túrde shyǵady. Naýqasqa eń jaqyn ornalasqan brıgada attanady. Osynyń arqasynda jaǵarmaı únemdelip, kólikterdiń tozýy baıaýlatyldy», - dedi J.Qasymjanova.
