Almatyda 2014 jyly qoǵamdyq kólikter qyzmetin elektrondyq bıletke aýystyrý jumysy bastalady
ALMATY. 8 mamyr. QazAqparat - Almatyda qoǵamdyq kólikterdi elektrondyq bıletke kóshirý júıesi ázirlenip jatyr. Bul týraly qalalyq jolaýshylar kóligi basqarmasynyń bastyǵy Talǵat Abdrahmanov búgin almaty-transport.kz portalynyń tanystyrylymy kezinde aıtty.
«Qoǵamdyq kólikterdi elektrondyq bıletke kóshirý úshin Eýropa qaıta qurý jáne damý banki 1 jyl buryn grant bólgen edi. Bul másele boıynsha jumys jasap jatqan frantsýzdyń Iksı kompanııasy jyldyń aıaǵyna qaraı onyń qujattaryn daıyndap, bizge tanystyrady. Ony Eýropa qaıta qurý jáne damý bankiniń nesıesimen júzege asyrý týraly kelisimimiz bar», - deıdi T.Abdrahmanov. Onyń aıtýynsha, qoǵamdyq kólikter qyzmetin elektrondyq bıletke aýystyrý júıesi jasalǵan soń, 2014 jyly baıqaý jarııalanyp, ony júzege asyratyn arnaıy mekeme belgilenbek. Ol kezde qoǵamdyq kólikter arqyly jolaýshylar tasymaldaý júıesi ózgerip, qyzmet sapasy jańa deńgeıge kóterilmek.
