Almatyda 2012 jyly qoǵamdyq kólikter 3 mlrd. 770 mln. jolaýshy tasymaldady
ALMATY. 22 qańtar. QazAqparat - Almatyda sońǵy 2 jylda qoǵamdyq kólikter 33 paıyzǵa jańardy. Qalalyq jolaýshylar kóligi basqarmasynyń bastyǵy Talǵat Ábdirahmanovtyń aıtýynsha, shahardaǵy 24 tasymaldaýshyda 1250 avtobýs, 20 tramvaı, 118 trolleıbýs, 7 metro vagony bar.
Budan bólek taǵy 230 avtobýsty tasymaldaýshylar syrttan alady. Jolaýshylar tasymaldaýdaǵy 117 baǵyttyń 105-i - avtobýstyq, 10-y - trolleıbýstyq, 2-ýi - tramvaılyq.
«Avtobýstardyń 65 paıyzy 5 jyldan asqan, 19 paıyzy 15 jylǵa deıingiler bolsa, qalǵany 15 jyldan asqan kólikter. 2011-12 jyldary qoǵamdyq kólikter parki jańa 503 avtobýs jáne 100 trolleıbýspen tolyqty. Al qoǵamdyq kólikpen jolaýshylar tasymaldaý byltyr aldyńǵy jylmen salystyrǵanda 19 paıyzǵa artty. Sonyń nátıjesinde jolaýshylar sany 3 mıllıard 770 mıllıon adamdy qurady», - deıdi Talǵat Ábdákárimuly. T. Ábdirahmanovtyń sózine qaraǵanda, aǵymdaǵy jyly qalada 2-shi mýnıtsıpıaldy avtobýs parki ashylady. Ondaǵy 200 avtobýs pen 200 taksı túgeldeı gazben jumys isteıtin bolady.
